miðvikudagur, 24. október 2018
 
TölublöðVenjuleg útgáfa

77.000 tonna viðbót

2. febrúar 2018 kl. 18:24

Heildaraflamarkið á loðnuvertíðinni 2017/2018 verður 285 þúsund tonn.

Niðurstaða loðnuleiðangurs Hafrannsóknarstofnunar er að heildarkvótinn á yfirstandandi loðnuvertíð verði 285.000 tonn. Það er 77.000 tonna viðbót við upphafskvótann sem gefinn var út í haust.

Í tilkynningu frá stofnuninni segir:

Rannsóknasvæðið í janúar var landgrunnið og landgrunnsbrúnin frá Grænlandssundi, austur með Norðurlandi og út af Austfjörðum. Gerðar voru 2 mælingar á veiðistofninum. Sú fyrri fór fram dagana 17. - 22. janúar og fannst kynþroska loðna frá norðanverðum Austfjörðum norður um og vestur fyrir Kolbeinseyjarhrygg. Þar fyrir vestan var einkum að finna ungloðnu. Þar sem veður var slæmt þegar mælingu var um það bil að ljúka leituðu skipin vars. Síðari yfirferðin fór fram dagana 25. - 31. janúar á svæðinu frá sunnanverðum Vestfjörðum og norður um, allt að Austfjörðum. Veður var viðunandi á meðan mælingar fóru fram en þó náðist ekki að skoða svæðið út af Vestfjörðum í fyrri yfirferðinni.

Um 849 þúsund tonn af kynþroska loðnu mældust í fyrri yfirferðinni og mæliskekkja var metin 0.38 sem er mesta mæliskekkja sem sést hefur frá því að aflaregla var tekin upp árið 2015. Í síðari yfirferðinni mældust um 759 þúsund tonn og mæliskekkjan metin 0.18.

Þar sem ekki er marktækur munur á niðurstöðum allra þessara mælinga voru þær notaðar saman til framreikninga og ákvörðunar aflamarks samkvæmt aflareglu. 

Gildandi aflaregla byggir á því að skilja eftir 150 þúsund tonn til hrygningar með 95% líkum. Tekur aflareglan tillit til óvissumats í mælingunum, vaxtar og náttúrulegrar dánartölu loðnu, auk þess sem afrán þorsks, ýsu og ufsa á loðnu er metið. Samkvæmt samantekt endurtekinna bergmálsmælinga er metið að hrygningarstofn loðnu hafi verið 849.000 tonn hinn 15. janúar. Þá er tekið tillit til þess afla sem hafði veiðst þegar mælingar voru gerðar. Í samræmi við ofangreinda aflareglu verður heildaraflamark á vertíðinni 2017/2018 því 285 þúsund tonn, eða 77 þúsund tonnum hærra en ákvarðað var í október síðastliðnum.