miðvikudagur, 17. janúar 2018
 
TölublöðVenjuleg útgáfa

Aflasamdráttur í ágústmánuði

15. september 2009 kl. 09:17

Aflinn í ágúst 2009 var 113 þúsund tonn samanborið við 142 þús. tonn í sama mánuði árið áður. Botnfiskafli dróst saman um rúm 3.000 tonn og nam tæpum 32.000 tonnum. Þar af var þorskaflinn tæp 13.000 tonn sem er 4.000 tonnum tonna aukning frá fyrra ári. 

Ýsuaflinn nam tæpum 6.000 tonnum sem er um 3.000 tonnum minni afli en í ágúst 2008. Ufsaaflinn dróst saman um 2.000 tonn á milli ára og nam um 6.000 tonnum en  3.000 tonn veiddust af karfa, sem er um 1.600 tonnum minna en í ágúst 2008.

Afli uppsjávartegunda nam tæpum 78.000 tonnum sem er um 26.000 tonnum minni en í sama mánuði í fyrra. Síldaraflinn stóð nokkurn vegin í stað milli ára og nam rúmum 63.000 tonnum. Um 13.000 tonn veiddust af makríl, sem er tæpum 27.000 tonnum minni afli en í ágúst 2008.

Flatfiskaflinn var tæp 2.000 tonn í ágúst og jókst um 192 tonn frá fyrra ári. Skel- og krabbadýraafli nam 851 tonni samanborið við 1.158 tonna afla í ágúst 2008.

Munur á afla á föstu verði og í tonnum

Heildarafli íslenskra skipa í nýliðnum ágústmánuði, metinn á föstu verði, var 11,9% minni en í ágúst 2008, samkvæmt upplýsingum á vef Hagstofunnar. Það sem af er árinu hefur aflinn aukist um 5,7% miðað við sama tímabil 2008, sé hann metinn á föstu verði.  Afli á föstu verði er reiknaður út til þess að finna breytingu á verðmæti heildaraflans að gefinni þeirri forsendu að verðhlutföll milli einstakra fisktegunda séu þau sömu og á ákveðnu viðmiðunarári sem hér er árið 2007. Hér er því um að ræða hliðstæðu við umreikning á afla yfir í þorskígildi. Aflinn í tonnum sýnir hins vegar magn aflans án tillits til þess að fisktegundir eru misjafnlega verðmætar.

Sjá nánar á vef Hagstofunnar, HÉR