laugardagur, 26. maí 2018
 
TölublöðVenjuleg útgáfa

Ágætis fiskerí þrátt fyrir brælur

13. febrúar 2018 kl. 12:30

Gullver NS kemur til löndunar á Seyðisfirði. Mynd af vef SVN. Ljósm.: Ómar Bogason.

Ísfisktogarinn Gullver NS kom til Seyðisfjarðar í gær og var aflinn 110 tonn.

Ísfisktogarinn Gullver NS kom til Seyðisfjarðar í gær og var aflinn 110 tonn. Uppistaða aflans var þorskur. Heimasíða Síldarvinnslunnar sló á þráðinn til Þórhalls Jónssonar skipstjóra og spurði hvernig veiðiferðin hefði gengið:

„Við vorum fyrir norðan á Rifsbankanum og það var kolvitlaust veður. Það var á mörkunum að hægt væri að vera að. Hins vegar var nægan fisk að fá og þetta var fínn fiskur. Túrinn tók þrjá sólarhringa höfn í höfn og við vorum einungis tvo sólarhringa á veiðum. Það er búin að vera rysjótt tíð frá áramótum en það hefur fiskast þokkalega engu að síður. Janúaraflinn hjá okkur var um 480 tonn og það er allt í lagi. Lægðirnar halda áfram að koma og við ætluðum út í gærkvöldi en brottför var frestað til dagsins í dag vegna veðurs. Tíðarfarið hlýtur að fara að skána,“ segir Þórhallur.