sunnudagur, 22. júlí 2018
 
TölublöðVenjuleg útgáfa

Áhöfn Grundfirðings SH 24 sagt upp

9. apríl 2018 kl. 11:39

Grundfirðingur SH 24 Mynd/Þorgeir Baldursson

Sterk króna, há veiðigjöld og erfiðleikar við mönnun gerðu útslagið.

Fréttamiðillinn Skessuhorn segir frá því að línubátnum Grundfirðingi SH 24 muni verða lagt í lok maí næstkomandi. Búið er að segja upp allri áhöfn skipsins.

Í viðtali Skessuhorns við Friðbjörn Ásbjörnsson, framkvæmdastjóra Soffaníasar Cecilssonar hf. á Grundarfirði, sem gerir út skipið, segir hann að reksturinn hafi þyngst mikið á þessu ári.

„Rekstargrundvöllur Grundfirðings  SH 24 er algjörlega brostinn,“ segir Friðbjörn við fréttaritara Skessuhorns.

Ennfremur þetta: „Þetta eru margir þættir. Sterk króna, há veiðigjöld á þær fisktegundir sem skipið veiðir og svo höfum við verið í vandræðum með að manna skipið,“ segir Friðbjörn. „Veiðigjöldin fara úr 15,4 milljónum í 62,2 milljónir þannig að hækkunin er verulega íþyngjandi. Þetta er hækkun um 47 milljónir á milli ára og það er stór þáttur í því að staðan er eins og hún er.“