föstudagur, 19. janúar 2018
 
TölublöðVenjuleg útgáfa

Áhrif vatnsþrýstiplógs og storms á lífríki botns

26. febrúar 2009 kl. 12:21

Áhrif vatnsþrýstiplógs á kúfskel og aðrar lífverur í botni voru könnuð á 10 m dýpi í Þistilfirði á vegum Hafrannsóknastofnunarinnar. Guðrún G. Þórarinsdóttir flytur erindi um niðurstöður rannsóknanna í málstofu Hafrannsóknastofnunar á morgun, föstudag.

Bornar voru saman lífverur (tegundir og fjöldi) í plógförum strax eftir plægingu og á nærliggjandi órsökuðum svæðum. Plógförin og óröskuð svæði voru síðan könnað aftur 3, 12, og 24 mánuðum seinna. Af þeim skeljum sem eftir voru í plógfarinu voru að meðaltali 21% brotnar, en þessar skeljar voru mun minni en þær sem veiddust.

Plógfarið hvarf skömmu eftir plægingu og áhrif veiðanna á botndýrasamfélögin voru skammvinn þar sem flestar tegundir höfðu náð fyrra ástandi fáum mánuðum seinna. Stærri lífverur eins og kúfskelin hafa hins vegar ekki komið aftur í sama mæli og þær voru fyrir, þó að nýliðun þeirra virðist mun meiri í plógfarinu en utan þess.

Kúfskel finnst aðallega niðurgrafin í mjúkum botni. Í stormi í apríl 2006 losnuðu kúfskeljar úr setinu og bárust í stórum stíl upp á harðan botn nálægt landi. Á hörðum botni geta skeljarnar ekki grafið sig niður og urðu því auðveld bráð ýmissa afræningja.

Í apríl 2007 voru engar lifandi kúfskeljar á harða botninum en aðeins skeljabrot sjáanleg.

Flutningur erindisins hefst klukkan 12,30 í fundarsal á 1. hæð að Skúlagötu 4 og eru allir velkomnir.