fimmtudagur, 18. janúar 2018
 
TölublöðVenjuleg útgáfa

Áhyggjur af öryggi sjómanna

10. janúar 2018 kl. 16:01

Landssamband smábátaeigenda hefur áhyggjur af því að lækkun fjárframlaga til Landhelgisgæslunnar skerði öryggi.

Landssamband smábátaeigenda (LS) sendi í dag frá sér yfirlýsingu þar sem lýst er yfir miklum áhyggjum vegna þeirrar fyrirætlunar að lækka fjárframlög til Landhelgisgæslunnar. Gangi hún eftir muni öryggi sjómanna skerðast.

„LS skorar á alþingismenn að tryggja nægt fjármagn til reksturs Landhelgisgæslunnar þannig að trygg verði sú þjónusta sem henni er lögskipað að sinna. Þyrluþjónusta er öryggisþáttur sem ávallt verður að vera vel sinnt og ekki má undir neinum kringumstæðum draga úr,“ segir í yfirlýsingunni.

Þá ítrekar Landssamband smábátaeigenda fyrri samþykktir sínar um nauðsyn þess að ræða við nágrannaþjóðir okkar um hvort hugsanlegt væri að einhver þeirra eða allar gætu ásamt Íslendingum komið að rekstri þyrlna við Norður-Atlantshaf.

Landsambandið segir ljóst að nokkrar þjóðir hefðu þar beina hagsmuni, eins og Færeyingar, Norðmenn, Danir og Grænlendingar. Í framtíðinni gæti þetta samstarf ef af yrði jafnvel leitt af sér stofnun sameiginlegrar björgunarmiðstöðvar við N-Atlantshaf með aðsetur hér á landi.