miðvikudagur, 19. september 2018
 
TölublöðVenjuleg útgáfa

Brennir þriðjungi minni olíu og veiðir á við tvo

15. ágúst 2018 kl. 10:01

Skrúfan á nýja Breka VE er engin smásmíði. (Mynd af vef VSV).

Nýr togari Vinnslustöðvarinnar í Vestmannaeyjum stenst allar væntingar útgerðarinnar og gott betur.

Nýr ísfiskstogari Vinnslustöðvarinnar, Breki, gerir gott betur en að uppfylla væntingar útgerðar og áhafnar til skipsins í fyrstu veiðiferðunum eftir heimkomuna frá Kína.

Þetta kemur fram í frétt á heimasíðu fyrirtækisins. Þar segir:

Breki afkastar á við báða togarana sem hann leysti af hólmi hjá VSV en brennir þriðjungi minni olíu en hvor togaranna um sig hefði gert við veiðarnar og jafnvel gott betur. Og það þó Breki dragi tvö troll í einu.

„Þetta lofar virkilega góðu og olíueyðslan er minni en ég bjóst við,“ segir Magnús Ríkarðsson skipstjóri. Hann stóð vaktina í brúnni í dag og stýrði fleyi sínu af miðum fyrir vestan land áleiðis til heimahafnar í Eyjum með hátt í fullfermi, um 400 kör af þorski, karfa og ufsa.

Orkunýting & olíusparnaður

Skrúfurnar á systurskipunum Breka og Páli Pálssyni ÍS eru þær stærstu í íslenska fiskiskipaflotanum, hannaðar af Sævari Birgissyni í Skipasýn. Í skrúfustærðinni liggur olíuhundurinn grafinn.

Á hönnunarskeiði Breka og Páls var talað um að með því að stækka skrúfur þeirra og hægja á þeim mætti fá mun meira afl með mun minni orku, jafnvel svo að olíunotkunin minnkaði um allt að 40%.

„Reynslan í fyrstu veiðiferðum Breka staðfestir að forsögn skrúfuhönnuðarins stenst fullkomlega. Orkunýtingin er jafnvel enn betri en við þorðum að vona,“ segir Guðni I. Guðnason, umsjónarmaður skiparekstrar og fasteigna Vinnslustöðvarinnar.