föstudagur, 21. september 2018
 
TölublöðVenjuleg útgáfa

Deilur um Norðursjávarþorsk rugla Þjóðverja í ríminu

23. febrúar 2009 kl. 14:30

Sú ákvörðun World Wildlife Fund, WWF, að halda Norðursjávarþorski á svokölluðum  "rauðum lista" hefur valdið misskilningi á meðal kaupenda sjávarafurða, neytenda og stjórnmálamanna. Sjávarútvegsvefurinn IntraFish hefur þetta eftir heimildarmönnum innan atvinnugreinarinnar í Þýskalandi.

Þrátt fyrir að Evrópusambandið hafi í desember sl. ákveðið að auka þorskkvóta í Norðursjónum um 30% í ljósi betra ástands þorskstofnsins hefur WWF ekki fjarlægt þorskinn af "rauðum lista" samtakanna. Þau halda því fram að Norðursjávarþorskur sé enn ofveiddur. Samtökin hafa flokkað fisktegundir í grænt, gult og rautt og hvatt neytendur til að sniðganga tegundir sem eru á rauðum lista þess.

Í frétt IntraFish segir að misvísandi skilaboð þýskra stjórnvalda bæti ekki úr skák. Þannig styður  eitt ráðuneyti ákvörðun um auknar veiðiheimildir á meðan annað styður WWF og stefnu þess í málinu.

"Algert klúður," segir Matthias Keller, formaður samtaka þýskra fiskvinnslustöðva. "Kaupendur og neytendur þurfa áreiðanlegar upplýsingar. Það markmið næst ekki á meðan eitt ráðuneyti segir að allt í lagi sé að borða þorsk en annað ráðuneyti heldur fram hinu gagnstæða."

Skýrt er frá þessu á vef LÍÚ.