miðvikudagur, 16. janúar 2019
 
TölublöðVenjuleg útgáfa

Dótturfélag Samherja í eigendahóp Völku

4. janúar 2019 kl. 12:00

Valka vatnskurðarvél. Mynd/Valka

Ice Tech ehf. fer nú með 20% eignarhluta í Völku ehf. eftir kaup af Vortindi ehf.

Gengið hefur verið frá kaupum dótturfélags Samherja, Ice Tech ehf, á um 20% eignarhluta í Völku ehf. af Vortindi ehf. Með þessum viðskiptum er Samherji orðinn einn af stærri hluthöfum Völku ásamt Helga Hjálmarssyni, stofnanda og framkvæmdastjóra Völku, Vogabakka ehf., Vindhamri ehf. og Fossum ehf. Samherij hefur lengi verið í samstarfi við Völku um tækjabúnað í landvinnslur félagsins hér á landi.

Þetta kemur fram í fréttatilkynningu frá Völku ehf. og Samherja hf. Þar segir jafnfram:

„Það er afar ánægjulegt að fá sterkan bakhjarl á borð við Samherja inn í eigendahóp Völku. Við höfum unnið farsællega saman að tækniþróun í landvinnslu Útgerðarfélags Akureyrar undanfarin ár og gerðum nýverið stóran samning um aðkomu að búnaði í nýrri landvinnslu Samherja á Dalvík,” segir Helgi Hjálmarsson, framkvæmdastjóri Völku við tilefnið.

„Við erum spennt að taka þátt í frekari þróun innan Völku. Samherji er þátttakandi í þessari grein í gegnum önnur félög eins og til dæmis Slippinn á Akureyri og Kælismiðjuna Frost.  Lausnir Völku hafa reynst mjög vel í sjávarútvegi hér á landi. Ég hef trú á að Valka geti gert sig enn meira gildandi á hinum alþjóðlega markaði og er fjárfestingin hugsuð til að styðja frekar við bakið á útflutningi á íslensku hug- og verkviti og það hyggjumst við gera áfram innan vébanda Ice Tech.” segir Eiríkur S. Jóhannsson, stjórnarformaður Samherja og Ice Tech.

Valka var stofnað árið 2003 og sérhæfir sig í hátæknilausnum í sjávarútvegi og hefur meðal annars verið leiðandi í þróun á vatnsskurðarvélum. Fyrirtækið hefur verið í örum vexti og tvöfaldaðist nánast velta Völku árið 2018 frá fyrra ári. Valka starfar á alþjóðamarkaði og selur vörur og þjónustu víðsvegar í Evrópu og Bandaríkjunum.