föstudagur, 14. desember 2018
 
TölublöðVenjuleg útgáfa

ESB getur breytt löggjöf á sviði fiskimála að vild

20. febrúar 2009 kl. 09:51

segir Stefán Már Stefánsson lögfræðiprófessor

„Evrópusambandið getur breytt löggjöf á sviði fiskimála að vild með auknum meirihluta,“ sagði Stefán Már Stefánsson, prófessor í lögfræði við Háskóla Íslands, í hádegisverðarerindi á vegum Lögfræðingafélags Íslands í vikunni. Erindi Stefáns bar yfirskriftina: Eru fiskveiðireglur Evrópusambandsins andstæðar hagsmunum Íslands?

Í erindi sínu rakti Stefán Már grunnþætti hinnar sameiginlegu fiskveiðistefnu Evrópusambandsins, benti á ýmsar mótsagnir í reglugerðarverkinu og vakti jafnframt athygli á því að í afleiddri löggjöf sambandsins fælust mjög víðækar heimildir. Hann kom inn á svokallað kvótahopp, sem Bretar urðu t.d. illa fyrir barðinu á, og sagði í senn erfitt og óljóst hvernig girða mætti fyrir slíkar uppákomur.

Stefán fór yfir reynslu Norðmanna í aðildarviðræðum 1994 og sagði þá hvorki hafa komist lönd eða strönd með sínar kröfur. Færi svo að Ísland sækti um aðild sagði Stefán Már það grundvallaratriði að samningsmarkmið væru skýr frá upphafi. Annars væri hætta á að samningamenn sneru heim með loðnar yfirlýsingar, rétt eins og gerðist í Noregi. Þar höfnuðu Norðmenn aðild í þjóðaratkvæðagreiðslu

Greint er frá þessu á vef LÍÚ