mánudagur, 17. desember 2018
 
TölublöðVenjuleg útgáfa

Fjögur skip í makrílrannsóknum við landið

7. október 2009 kl. 09:03

Fjögur íslensk tog- og nótaskip hafa undanfarna daga tekið þátt í makrílrannsóknum fyrir Austur- og Suðausturlandi sem skipulagðar eru af Hafrannsóknastofnun. Skipin eru Ingunn AK, Hoffell SU, Kap VE og Sighvatur Bjarnason VE. I

ngunn lauk skipið yfirferð sinni í nótt sem leið að því er fram kemur á heimasíðu HB Granda. Alls tók skipið átta klukkutímalöng tog nyrst á fyrirframgreindu rannsóknasvæði út af Austfjörðum. Að sögn Vilhjálms Vilhjálmssonar hjá HB Granda varð vart við makríl á nokkrum togstöðvanna auk þess sem nokkur tonn af blandaðri síld komu upp en þar var um að ræða íslenska sumargotssíld og norsk-íslenska vorgotssíld sem héldu sig á sömu togslóðinni.

Samkvæmt lýsingu á rannsóknaverkefninu er markmiðið að fylgjast með því hve makríll dvelur lengi í íslenskri lögsögu á haustin og fylgjast með gönguleiðum hans þegar hann dregur sig til baka á vetursetustöðvarnar í Norðursjó og norðan og vestan Bretlandseyja.

Svæðið, sem valið var til rannsóknanna, nær frá landgrunninu fyrir Austur- og Suðausturlandi að mörkum landhelginnar milli 65°30’N og 63°00’N. Líklegt er talið að um þetta svæði muni makríllinn, sem gengið hefur inn á miðin fyrir Suðvestur-, Suður-, Austur- og Norðausturlandi í sumar, ganga er hann hverfur af Íslandsmiðum.