mánudagur, 25. júní 2018
 
TölublöðVenjuleg útgáfa

Fjórðungi heildarafla heims stjórnað með kvótakerfi

1. september 2009 kl. 09:26

„Kvótakerfi með framseljanlegum aflaheimildum er samnefnari þeirra framfara sem orðið hafa í fiskveiðum og stjórnun þeirra,“ sagði dr. Ragnar Árnason, prófessor í fiskihagfræði við Hagfræðideild Háskóla Íslands,  m.a. í erindi sínu á ráðstefnu um skilvirka fiskveiðistjórnun sem lauk í Reykjavík fyrir helgina.

Ragnar kom í erindi sínu inn á árangur af kvótakerfum við stjórnun fiskveiða og sagði reynsluna af þeim almennt góða og að þau hefðu aukið arðbærni veiða og skilvirkni atvinnugreinarinnar. Þannig beittu 15 af helstu fiskveiðiþjóðum heims kvótakerfi til þess að stýra heildaraflamagni. Nærri léti því að um 20-25% alls heildarafla í heiminum væri veiddur með kvótakerfi sem stjórntæki.

Í erindinu rakti Ragnar helstu kosti kvótakerfis með framseljanlegum aflaheimildum við stjórnun veiða. Þar væri fyrst til að nefna góða nýtingu á heildarafla, aukna hagkvæmni og verðmæti afla samfara því sem dregið væri úr sóknarþunga.  Þá væri í kerfinu innbyggður hvati til þess að ganga vel um auðlindina og hafið, þar sem útgerðir væru í reynd að gæta að eigin verðmætum og reyna að auka þau.

Ragnar sagðist telja að með framseljanlegum aflaheimildum í kvótakerfi væri í raun búið að leggja grunn að því að sjávarútvegurinn bæri sjálfur ábyrgð á stjórn veiða. Sambærilegt sjónarmið kom einnig fram í erindi Stan Crothers, fyrrum starfsmanns nýsjálenska sjávarútvegsráðuneytisins, á ráðstefnunni. Þessi tvö lönd, Ísland og Nýja Sjáland, eru jafnan nefnd í sömu andrá þegar ábyrga og árangursríka fiskveiðistjórnun ber á góma.Crothers sagði í erindi sínu að til framtíðar ætti að færa stjórnun veiðanna að fullu á herðar handhafa veiðiheimildanna innan þess lagaramma sem stjórnvöld settu þeim.

Frá þessu er skýrt á vef LÍÚ.