þriðjudagur, 16. janúar 2018
 
TölublöðVenjuleg útgáfa

Flottrollshlerar reyndir við botntroll með góðum árangri

15. júní 2009 kl. 13:31

Barði NK-120 hefur frá 16. maí prófað að nota flottrollshlera framan við hefðbundið botntroll.  Hlerarnir eru frá Thyboron í Danmörku, tegund 15 VF.  Trollið er Hemmer T-90 frá Fjarðaneti.

Bjarni Ólafur Hjálmarsson skipstjóri á Barða NK segir á heimasíðu Síldarvinnslunnar í Neskaupstað að þeir hafi reynt hlerana við ólíkar aðstæður og á misjöfnu dýpi á hefðbundinni veiðislóð.  Engir erfiðleikar séu því samfara að vinna með hlerana í bröttum köntum og haldi þeir mjög jafnri hæð frá botni.

,,Fiskiríið er ekki minna en með botnhlerum og minna er um festur. Olíusparnaður reyndist vera á bilinu 12-15%. Álag á togvindur og annan búnað er mun minna en með notkun botnhlera og ekki tekur lengri tíma að afgreiða trollið en áður.

Heldur meira af togvír þarf að nota eða um þrefalt botndýpi,” segir á vef Síldarvinnslunnar. Skipstjórinn á Barða NK ætlar að halda áfram að nota flottrollshlerana.