fimmtudagur, 20. september 2018
 
TölublöðVenjuleg útgáfa

Fullfermi eftir 30 tíma túr ekki óalgengt

16. apríl 2018 kl. 10:18

Skip Bergs-Hugins hafa fiskað vel það sem af er ári. Ljósm. Guðmundur Alfreðsson

Vestmannaey VE og Bergey VE lönduðu 2.900 tonnum fyrstu þrjá mánuði ársins.

Vestmannaey VE og Bergey VE hafa rótfiskað það sem af er ári. Afli skipanna var 2.900 tonn af slægðum fiski fyrstu þrjá mánuði ársins og var aflaverðmætið um 640 milljónir króna.

Frá þessu segir í frétt á heimasíðu Síldarvinnslunnar. Það er Bergur-Huginn, dótturfyrirtæki Síldarvinnslunnar,  sem gerir út Eyjarnar.

Er þetta mesti afli sem skipin hafa fært að landi á þremur fyrstu mánuðum árs, en það ár sem næst kemst hvað afla varðar er 2009 en þá var afli skipanna rúmlega 2.500 tonn. Hvað aflaverðmæti varðar kemst árið 2015 næst en þá var það rúmlega 630 milljónir.

Frá því segir jafnframt að í marsmánuði veiddu skipin tæplega 1.140 tonn en þau voru hvort um sig einungis 16 daga á sjó, þannig að meðalafli hvors skips var 36 tonn á dag. Aflasamsetningin í marsmánuði er býsna fjölbreytt en skipin komu alls með 22 tegundir að landi. Þorskur var 35% aflans, ýsa 23%, ufsi 14%, karfi 10% og lýsa 3,5%.

Frá því í febrúarmánuði hefur helsta veiðisvæði skipanna verið í kringum Vestmannaeyjar og því hefur ekki þurft að sigla langt á miðin. Í marsmánuði fór hvort skip tvær veiðiferðir í viku og tók hver veiðiferð að meðaltali innan við tvo sólarhringa. Ekki var óalgengt að landað væri fullfermi að lokinni 30 tíma veiðiferð, segir í fréttinni.