þriðjudagur, 25. september 2018
 
TölublöðVenjuleg útgáfa

Fyrning aflaheimilda aðför að 32.000 fjölskyldum

22. apríl 2009 kl. 13:42

segir í ályktun Félags ungs fólks í sjávarútvegi

Stjórn Félag ungs fólks í sjávarútvegi hefur sent frá sér ályktun vegna stefnu stjórnarflokkanna um fyrningu aflaheimilda. Þar segir að slík aðgerð myndi kollvarpa því trausta og hagkvæma skipulagi sem ríkt hafi í sjávarútvegi um árabil og setji afkomu tugþúsunda einstaklinga um land allt í mikla óvissu.

Í ályktuninni segir m.a.:

 ,,90% aflaheimilda eru í höndum fyrirtækja sem keypt hafa heimildir sínar á markaði og fengu ekki aflaheimildum úthlutað við upphaf kerfisins 1984. Að gera þær heimildir upptækar með valdi er óréttlæti í sinni tærustu mynd og ábyrgðarhlutur af stjórnmálamönnum að leggja slíkt til. Óréttlátt er að refsa þeim sem keypt hafa aflaheimildir og byggt upp sterkasta sjávarútveg heims fyrir úthlutun stjórnmálamanna árið 1984.

Sjávarútvegur er burðarstólpi í íslensku atvinnulífi og hefur síðastliðin 10 ár skapað um 60% allra útflutningstekna landsins.

Stjórnmálamenn eru hvattir til þess að víkja snarlega frá hugmyndum um þjóðnýtingu aflaheimilda taka þess í stað stöðu með þeim heiðarlegu og dugmiklu vinnandi fólki í sjávarútvegi.

Slá þarf skjaldborg um þær 32.000 fjölskyldur sem byggja afkomu sína á sjávarútvegi," segir í ályktuninni.