mánudagur, 26. júní 2017
 
TölublöðVenjuleg útgáfa

Fyrsti kolmunnafarmurinn til Eyja

19. apríl 2017 kl. 10:43

Um borð í Ísleifi VE í þessari veiðiferð. (Mynd af vef VSV).

Ísleifur VE kom með 2.000 tonn sem veiddust suður af Færeyjum.

Ísleifur VE, skip Vinnslustöðvarinnar, kom til heimahafnar í dag með fyrsta kolmunnafarminn sem tekið er á móti í Eyjum á þessu ári. Í skipinu voru um 2.000 tonn sem veiddust suður af Færeyjum.

„Kolmunninn er horaður ennþá og á eftir að bæta á sig þegar kemur fram á sumarið. Vertíðin lítur annars vel út, við heyrum að mikið hafi fengist af kolmunna við Írland í vetur og úr þeim sama stofni veiddum við nú,“ segir Helgi Geir Valdimarsson, skipstjóri á Ísleifi í viðtali á heimasíðu VSV.

„Við sigldum 420 mílur af miðunum til Eyja og vorum hálfan annan sólarhring á leiðinni í slæmu veðri á kafla. Ég geri ráð fyrir því að við förum út aftur á morgun.“