föstudagur, 14. desember 2018
 
TölublöðVenjuleg útgáfa

Gulldepluveiðar að hefjast

20. október 2009 kl. 17:03

,,Við búumst við að Ingunn AK fari til gulldepluveiða um miðja næstu viku. Það er eitt skip, Hoffell SU, farið að leita gulldeplu en skipið er nú í Vestmannaeyjahöfn vegna veðurs,” segir Vilhjálmur Vilhjálmsson deildarstjóri uppsjávarsviðs HB Granda í viðtali á heimasíðu fyrirtækisins.

Sem stendur hafa verið gefin út nokkur leyfi til tilraunaveiða á gulldeplu og gilda þau eingöngu út nóvember. Í fyrra hóf Huginn VE tilraunaveiðar í desember en skriður komst fyrst á veiðarnar í janúar á þessu ári eftir að veiðarfæratilraunir fóru að bera árangur.

Á heimasíðu HB Granda segir einnig að Faxi RE og Lundey NS fari um eða upp úr næstu helgi til síldarrannsókna, en fjögur önnur uppsjávarskip eru nú að hefja þessar rannsóknir eins og fram kemur í annarri frétt hér á vefnum. Miðað er við að hvert þessara skipa verji fjórum dögum til rannsóknanna, en alls munu uppsjávarútgerðir leggja 40 úthaldsdaga í þetta verkefni, að sögn Vilhjálms.

Íslensk uppsjávarveiðiskip hafa flest verið bundin við bryggju eftir að veiðum á norsk-íslensku síldinni lauk og horfur það sem eftir lifir ársins eru ekki mjög góðar ef veiðar á íslensku sumargotssíldinni verða ekki heimilaðar í vetur. Vilhjálmur segir að á meðan beðið sé niðurstöðu úr rannsóknum á síldarstofninum horfi menn til veiða á gulldeplu en sú fisktegund var fyrst veidd að einhverju marki fyrir einu ári.