þriðjudagur, 19. júní 2018
 
TölublöðVenjuleg útgáfa

Hrognavinnsla hafin í Helguvík og í Neskaupstað

8. mars 2018 kl. 15:14

Loðnuhrogn unnin í fiskiðjuveri Síldarvinnslunnar í Neskaupstað. Mynd/Hákon Ernuson

Hrognaþroskinn nokkur góður.

Verið að vinna loðnuhrogn á vegum Síldarvinnslunnar bæði í Helguvík og Neskaupstað. Fyrstu hrognaloðnunni var landað úr Vilhelm Þorsteinssyni EA í Helguvík í fyrrinótt og í gær og er enn verið að frysta hrogn úr honum, að því er kemur fram í frétt á heimsíðu fyrirtækisins.

Að sögn Guðjóns Helga Þorsteinssonar gekk vel að vinna hrognin og reyndust gæði þeirra mikil.  „Við vonumst bara eftir því að fá meiri loðnu til hrognavinnslu hið fyrsta, en það er að sjálfsögðu háð því hvernig gengur að veiða,“ sagði Guðjón.

Byrjað var að kreista hrogn úr farmi Barkar NK í Neskaupstað síðastliðna nótt, segir í sömu frétt. Að sögn Jóns Gunnars Sigurjónssonar, yfirverkstjóra í fiskiðjuverinu, hefur vinnslan gengið vel.

„Það kemur mikið af hrognum úr farminum og þroskinn er nokkuð góður,“ sagði Jón Gunnar.

Gert er ráð fyrir að lokið verði við að vinna hrogn úr farmi Barkar í fyrramálið en skipið kom að landi með 2.000 tonn.