þriðjudagur, 25. september 2018
 
TölublöðVenjuleg útgáfa

Innleiða nýtt eftirlitskerfi fyrir Ástralíu

9. júlí 2018 kl. 07:00

Aðsend mynd

Kerfi Trackwell heldur utan um veiðar skipa og öll samskipti við aðrar þjóðir og svæðisbundin fiskveiðisamtök.

Trackwell vann nýverið útboð fyrir uppsetningu á fiskveiðieftirlitskerfi fyrir Ástralíu. Útboðið var á vegum Fiskveiðieftirlitsstofnunar Ástralíu til að vakta víðáttumikla efnahagslögsögu landsins. Trackwell hefur nú innleitt  kerfið  og mun sinna þjónustu og uppfærslum í framhaldinu.

Sjö þúsund skip vöktuð

Trackwell fiskveiðieftirlitskerfið er í grunninn það sama og það sem gjarnan er nefnt fjareftirlitskerfi á Íslandi.  Kerfið býður upp á víðtæka vöktun skipa, og ýmsa valkosti og gerir Áströlum kleift að sinna eftirliti með sinni efnahagslögsögu, ásamt veiðum á afmörkuðum svæðum.

Fiskveiðieftirlitsstofnun Ástralíu getur nú, í rauntíma, fylgst með atferli þeirra þúsunda skipa sem sigla umhverfis heimsálfuna en efnahagslögsaga Ástralíu er sú þriðja stærsta í heimi og spannar 8.2 milljón ferkílómetra. Þá eru með taldar þær aflandseyjur sem heyra undir  yfirráða svæði Ástralíu.

Kolbeinn Gunnarsson, sviðsstjóri sjávarútvegssviðs Trackwell, segir í tilkynningu um verkefnið að þessi samningur marki tímamót hjá Trackwell.

„Í fyrsta lagi gefur hann okkur möguleikann á að vinna náið með áströlskum yfirvöldum að vakta alla skipaumferð og atferli þeirra skipa sem sigla um Kyrrahafið, stóran hluta Indlandshafs og suður-Íshaf. Í öðru lagi staðfestir samningurinn stöðu Trackwell sem leiðandi þjónustu- og söluaðila fiskveiðieftirlitskerfa á heimsvísu.“ 

Í tilkynningu frá fyrirtækinu segir að kerfið heldur ekki aðeins utan um veiðar skipa heldur sér það um samskipti þeirra við aðrar þjóðir og svæðisbundin fiskveiðisamtök. Þá mun kerfið einnig styðja við innleiðingu á Flux (e. Fisheries Language for Universal Exhange) sem mun styðja við dreifingu á öllum gögnum kerfisins.

Trackwell VMS í 22 ár

Trackwell kerfið hefur verið í þróun í samstarfi við Landhelgisgæslu Íslands, Neyðarlínuna, Sjávarútvegsráðuneytið, auk fjölda erlendra viðskiptavina síðan 1996. Með þessu samstarfi hefur kerfið verið aðlagað að breytilegum aðstæðum mismunandi hafsvæða svo það uppfylli allar alþjóðlegar reglugerðir og staðla um gagnasamskipti milli ríkja og aðliggjandi eftirlitssvæða, að sögn fyrirtækisins.