fimmtudagur, 23. maí 2019
 
TölublöðVenjuleg útgáfa

Íslensk og norsk skip leita nú loðnu á stóru svæði

15. febrúar 2019 kl. 17:10

Loðna (Mynd: Þorbjörn Víglundsson).

Gott samstarf útgerða og Hafrannsóknastofnunar um að leita loðnu meðan von er.

Fimm skip leita nú loðnu úti fyrir Austurlandi og Suð-Austurlandi. Fréttir hafa borist af loðnu úti fyrir sunnanverðu landinu en engar staðfestingar borist um að ástandið sé betra en verið hefur.

Þetta kemur fram í umfjöllun Austurfréttar um loðnuleitina.

„Við ætlum að klára svæðið fyrir austan áður en gengur í brælu annað kvöld eða aðfaranótt sunnudags. Síðan tökum við stöðuna með hliðsjón af veðurspám um mælingar fyrir norðan land,“ segir Þorsteinn Sigurðsson, sviðsstjóri uppsjávarlífríkis hjá Hafrannsóknastofnun, í viðtali við Austurfrétt.

Í fréttinni kemur einnig fram að tvö norsk leitarskip, Roaldsen og Åkeröy, létu úr höfn á Seyðisfirði um hádegi í dag. Þeim er ætlað að leita bæði grunnt og djúpt út af Austfjörðum.

„Þau eru til aðstoðar við að þrengja það svæði sem mælingarskipin fara á, með öðrum á svæði sem við teljum litlar líkur að loðna sé á en þurfum samt að skoða,“ segir Þorsteinn.

Hið grænlenska Polar Amaroq lét úr höfn á Norðfirði seinni partinn í gær og leitar úti fyrir Suð-Austurlandi með Ásgrími Halldórssyni frá Hornafirði og Árna Friðrikssyni, skipi Hafrannsóknastofnunar. Þau fara skipulega yfir miðin frá Ingólfshöfða og austur úr.

Þorsteinn segir í viðtalinu við Austurfrétt að borist hafi fréttir frá togurum á hefðbundinni gönguslóð loðnunnar á miðunum úti fyrir Suð-Austurlandi að þeir hafi orðið varir við loðnu. Búið sé að skoða hluta af þeim gögnum og þau verði yfirfarin nánar um helgina. Fylgst sé með öllum fréttum.

Þessu til viðbótar hefur annað skip stofnunarinnar, Bjarni Sæmundsson, skoðað svæðið úti fyrir Vestfjörðum. 

Þetta er þriðja umferð loðnuleitar frá áramótum en enn hefur ekki fundist loðna í slíku magni að hægt sé að veita ráðgjöf um veiðar. Þorsteinn segir gott samstarf við útgerðirnar um að leita meðan von sé.