miðvikudagur, 18. júlí 2018
 
TölublöðVenjuleg útgáfa

Íslenskur búnaður í fjóra nýja togara

9. júlí 2018 kl. 15:15

Tölvugerð mynd af sjö skipum sem samið var um smíði á í fyrra. Lengst til vinstri eru tvö skip í litum Gjögurs, síðan kemur skip Útgerðarfélags Akureyringa, þá tvö skip Skinney-Þinganess og loks tvö skip Bergs-Hugins. Teikning/VARD

Skinney-Þinganes og Gjögur fjárfesta í íslenskum vinnslubúnaði fyrir nýja togara

Útgerðirnar Skinney-Þinganes og Gjögur hafa gert samning við íslenska fyrirtækið Micro um smíði á vinnslubúnaði í nýja togara hjá félögunum tveimur.

Hvor útgerð um sig fær afhent tvö samskonar skip og er því um að ræða fjögur skip í heildina. Skipin, sem búnaðurinn fer í, eru smíðuð hjá skipasmíðastöðinni VARD í Noregi og eru væntanleg til landsins á seinni hluta ársins 2019. Micro annast hönnun, smíði og uppsetningu á vél- og hugbúnaðarbúnaðarhluta verkefnisins, en hugbúnaðurinn er unninn í samstarfi við Völku. Uppsetning mun eiga sér stað við komu skipanna til hafnar á Íslandi.

Fyrir alla vinnslu um borð

Búnaðurinn sem um ræðir nær til allrar vinnslu um borð í skipunum, eða frá því fiskurinn kemur lifandi um borð og þar til hann er kominn í kör niður í lest. Öll hönnun og smíði búnaðarins er unnin í nánu samstarfi við útgerðirnar þar sem horft er til þess að saman fari góð meðferð afla, framúskarandi nýting hráefnis og besta mögulega vinnuaðstaða háseta, segir í tilkynningu frá Micro. Mikil áhersla er lögð á rétta blæðingu afla og öfluga kælingu, en það eykur gæði og verðmæti aflans.

Gunnar Óli Sölvason, framkvæmdastjóri Micro, segir það afar ánægjulegt að útgerðarfélögin velji að kaupa búnað af innlendum framleiðendum og styðja þannig við íslenskt hugvit.

Uppbygging tækniþekkingar og framfara í sjávarútvegi er samstarfsverkefni sem snertir okkur öll beint og óbeint. Hún stuðlar að aukinni verðmætasköpun og virðisaukningu innanlands, skapar störf og eykur útflutningsverðmæti þeirrar sameiginlegu auðlindar sem fiskurinn okkar er.“

Micro sérhæfir sig í á vélbúnaði tengdum sjávarútvegi og hönnun á lausnum við fiskvinnslu, allt frá kæli- og blóðgunarkörum upp í heilar vinnslulínur. Þá framleiðir félagið þvottakör og færibönd fyrir sjávarútveginn ásamt því að sinna viðgerðum og viðhaldi á tækjum og vélum tengdum sjávarútvegi.