mánudagur, 20. nóvember 2017
 
TölublöðVenjuleg útgáfa

Landa makríl og síld til skiptis

6. september 2017 kl. 13:54

Beitismenn taka trollið. Mynd/Helgi Freyr Ólason

Töluvert af síld í Norðfjarðardýpin en hún er sumstaðar makrílblönduð.

Bjarni Ólafsson AK kom til Neskaupstaðar í fyrradag með 400 tonn af makríl sem fékkst í Smugunni. Í frétt Síldarvinnslunnar er rætt við Gísla Runólfssonar skipstjóra, sem greinir frá því að þar var góð veiði en síðan brældi og þá var haldið í land. Lokið var við að landa úr Bjarna nú um hádegisbil.

Beitir NK kom síðan til Neskaupstaðar í gærmorgun og hófst löndun úr honum strax og löndun úr Bjarna lauk. Afli Beitis er tæplega 1.200 tonn og er meirihlutinn síld. 

Í frétt Síldarvinnslunnar segir Sturla Þórðarson, skipstjóri á Beiti, jafnframt að aflinn hafi fengist grunnt í Norðfjarðardýpinu. 

„Við drógum þarna í tvær nætur og fengum ágætan afla. Síldin kemur upp í myrkrinu. Það er töluvert af síld þarna en hún er sumstaðar makrílblönduð. Fyrri nóttina var mikið af makríl í aflanum. Í síðasta holinu sem við tókum var dregið upp við yfirborð og þá fékkst hreinn makríll. Ég hugsa að það séu um 400 tonn af makríl í aflanum sem við komum með,“ sagði Sturla.