þriðjudagur, 17. júlí 2018
 
TölublöðVenjuleg útgáfa

Loðnuvertíð hafin í Eyjum

13. febrúar 2018 kl. 14:42

Eyjólfur Guðjónsson í brú Ísleifs VE. Mynd/VSV/ARH

Ísleifur VE kom með fyrstu loðnuna í morgun - japanskir kaupendur mættir.

Skipið Ísleifur VE-63 kom með fyrsta loðnufarminn til Vestmannaeyja á vertíðinni, 250 tonn af fínum og átulausum fiski sem veiddist út af Hornafirði í gær.

Frá þessu segir á heimasíðu Vinnslustöðvarinnar.

Þar segir að vel mátti skynja spennu í lofti í nýju uppsjávarfrystihúsi Vinnslustöðvarinnar þegar sást til Ísleifs í morgunskímu og snjófjúki í innsiglingunni.

Fulltrúar japanskra kaupenda loðnuafurða komu til Eyja í gærkvöld og voru mættir á hafnarbakkann laust eftir rismál. Þeir deila frumsýningarstemningu með heimamönnum í dag, segir í fréttinni.

Jafnframt eftirfarandi:

Ísleifur VE hét áður Ingunn  AK 150, gerð út af HB Granda. Vinnslustöðin keypti skipið sumarið 2015.

„Gott skip sem getur borið allt að 2.000 tonnum,“ segir Eyjólfur Guðjónsson, skipstjóri. „Fyrir 30 til 40 árum hefði þótt tíðindum sæta að fá 250 tonn af loðnu í tveimur köstum en nú vill maður helst ekki tala um að koma til hafnar með svo lítið í lestinni! Tímarnir eru breyttir, nú skipta hráefnisgæðin meira máli en tonnafjöldi upp úr sjó.“

Eyjólfur hefur verið til sjós í 35 ár og skipstjóri frá 1987, með sömu körlunum í áhöfn ár eftir ár.

„Það er lítil hreyfing á mannskapnum, sem betur fer. Við erum allir Eyjamenn um borð að tveimur undanskildum, annar aðkomumaðurinn er fastráðinn en hinn í afleysingum. Góður og samhæfður hópur. Hvenær við förum aftur til veiða? Kannski á morgun. Þú verður annars að spyrja þá sem stjórna Vinnslustöðinni. Skipstjórar ráða fjandakornið engu lengur, við tökum bara við fyrirmælum úr landi!“

Annað Vinnslustöðvarskip, Kap VE, fór frá Eyjum í gærkvöldi áleiðis á miðin fyrir austan land, segir í fréttinni. Meiningin er að það komi til hafnar á morgun, miðvikudag, til löndunar.