mánudagur, 23. apríl 2018
 
TölublöðVenjuleg útgáfa

Loðnuleiðangur Hafró: Ekki hægt að leggja til loðnukvóta

22. desember 2009 kl. 09:46

Hvorki er hægt að leggja til loðnukvóta fyrir komandi vertíð né mæla með upphafskvóta fyrir vertíðina 2010/2011 að því er fram kemur í frétt frá Hafrannsóknastofnuninni um niðurstöður úr loðnumælingu að haustlagi 2009.

Dagana 24.11-16.12. fóru fram bergmálsmælingar á loðnu á R/S Árna Friðrikssyni á hafsvæðinu milli Íslands og Grænlands og í Íslandshafi ásamt hefðbundnum sjórannsóknum á þessum árstíma. Þessar mælingar beinast einkum að yngri árgöngum loðnunnar til að fá vísbendingar um við hverju megi búast á komandi vertíðum en eldri loðna kemur einnig inn í mælingarnar í mismiklum mæli.

Rannsóknasvæðið náði frá Faxaflóa að landgrunni Austur – Grænlands. Þaðan austur um fyrir Norðurlandi, suður með Austfjörðum og vestur með Suðurströndinni.

Hér á eftir fara helstu niðurstöður um dreifingu og magn loðnu.

Vestan Kolbeinseyjarhryggjar fannst ungloðna allt vestur að landgrunni Grænlands, vestur undir 30° V (2. mynd). Lóðningarnar voru víðast hvar mjög gisnar og engar þéttar torfur sáust. Haustið 2008 fannst mikið af loðnuseiðum á þessum tíma og var vonast til að sá árgangur myndi skila sér sem 1-árs fiskur í mælingum þeim sem nú er lokið. Sú varð þó ekki raunin og fjöldi eins árs ungloðnu mældist einungis um 15 milljarðar. Er það verulega undir því marki að hægt sé að mæla með upphafskvóta fyrir vertíðina 2010-2011.

Stórrar loðnu varð vart í litlu magni við og uppá landgrunnskantinum frá Langanesi og vestur undir Kolbeinseyjarhrygg. Veiðistofninn (2-3 ára fiskur) mældist um 140 þús. tonn. Aflaregla í loðnu gerir ráð fyrir að 400 þús. tonn séu skilin eftir til að hrygna þannig að ekki er unnt að leggja til loðnukvóta fyrir komandi vetrarvertíð á grundvelli þessara mælinga. Undanfarin ár hefur ekki tekist að mæla stærð veiðistofns loðnunnar fyrr en í janúar eða jafnvel fyrri hluta febrúar. Rannsóknaskipið Árni Friðriksson mun aftur halda til loðnurannsókna og mælinga snemma í janúar.