sunnudagur, 21. október 2018
 
TölublöðVenjuleg útgáfa

Lundey NS farin til loðnuleitar

10. febrúar 2009 kl. 11:10

Lundey NS, skip HB Granda, er farin til loðnuleitar í samráði við Hafrannsóknastofnun. Að sögn Vilhjálms Vilhjálmssonar, deildarstjóra uppsjávarveiðisviðs HB Granda, mun skipið fyrst kanna svæði djúpt fyrir austan landið. Reiknað er með að skipið verði við loðnuleit næstu tvo dagana eða svo.

,,Við reiknum með því að veiða rannsóknarkvótann í næstu viku í samráði við Hafrannsókn og aðrar útgerðir. Reyndar er það trú okkar og von að kominn verði á hefðbundinn kvóti fyrir vikulok,” segir Vilhjálmur á heimasíðu HB Granda.

Þess má geta að Lundey NS og Faxi RE tóku þátt í loðnuleit í samráði við Hafrannsóknastofnun í byrjun ársins. Bæði skipin eru útbúin með fjarskiptabúnaði sem gerir starfsmönnum Hafrannsóknastofnar á Skúlagötu kleift að fylgjast með því sem sést í fiskleitartækjum skipanna á hverjum tíma.