mánudagur, 26. júní 2017
 
TölublöðVenjuleg útgáfa

Makrílkvótinn - hörð mótmæli LS

10. apríl 2017 kl. 10:20

Makrílbátur á handfæraveiðum. (Mynd: Jón Páll Ásgeirsson).

LS vill fá 16% af makrílkvótanum og óskar eftir fundi með sjávarútvegsráðherra

Stjórn Landssambands smábátaeigenda hefur sent frá sér ályktun þar sem nýrri reglugerð um makrílveiðar 2017 er harðlega mótmælt. Reglugerðin taki í engu tillit til sjónarmiða LS um aukið vægi smábáta í veiðunum. Hefur LS óskað eftir fundi með sjávarútvegráðherra um málið. Sjá bréf LS  HÉR. 

Í ályktun stjórnar LS er skorað á ráðherra að verða við kröfu LS um 16% hlutdeild smábáta í makríl. Ályktun stjórnar LS fer hér á eftir:

Stjórn Landssambands smábátaeigenda mótmælir harðlega nýútgefinni reglugerð sjávarútvegs- og landbúnaðarráðherra um stjórn makrílveiða íslenskra fiskiskipa 2017.  Reglugerðin tekur í engu tillit til sjónarmiða LS um aukið vægi smábáta í veiðunum.
LS krefst þess að ráðherra endurskoði nú þegar ákvörðun sína og veiti smábátum tækifæri til öflunar veiðireynslu eins og gert var hjá stærri skipum.  Í engu er hægt að una við að skip sem áunnu sér veiðireynslu með frjálsum veiðum, löngu áður en makríll kom á grunnslóð, til þess eins að landa matfiski í bræðslu séu ítrekað verðlaunuð með því að úthluta þeim 96% aflaheimildanna.  Ennfremur að meiri afli en ætlaður er smábátum skuli úthlutað til skipa sem veiddu ekki eitt einasta kíló á síðustu makrílvertíð heldur leigðu frá sér allar sínar heimildir.
Þá er það umhugsunarefni hvers vegna ráðherra metur smábátum ekki til tekna að við veiðar á króka sparast yfir 3 milljónir lítra af díselolíu og andrúmsloftið mundi sleppa við mengun 10.000 tonna af CO2   
Stjórn LS skorar á ráðherra að verða við sanngjarnri kröfu um 16% hlutdeild smábáta í makríl.