miðvikudagur, 19. september 2018
 
TölublöðVenjuleg útgáfa

Mjög góð makrílveiði í Smugunni

5. september 2018 kl. 11:20

Beitir NK er á landleið úr Smugunni með 1.310 tonn af makríl. Mynd/Helgi Freyr Ólafsson

Norskur bátur fékk 900 tonn af makríl í nót.

Nú er mjög góð makrílveiði í Smugunni. Skipin eru gjarnan að hífa 300 tonn eftir að hafa dregið skamman tíma.

Frá þessu segir í frétt á heimasíðu Síldarvinnslunnar. Það heyrir einnig til tíðinda, segir þar, að norskur bátur fékk þar 900 tonn af makríl í nót í gær.

Börkur NK kom til Neskaupstaðar í gærkvöldi með 640 tonn og hófst strax vinnsla í fiskiðjuveri Síldarvinnslunnar. Aflinn er heilfrystur að miklu leyti.

Í kjölfar Barkar verður unninn afli úr Bjarna Ólafssyni AK sem er á landleið með tæplega 700 tonn. Beitir NK hefur verið að fá mjög góðan afla að undanförnu og er lagður af stað til Neskaupstaðar með 1.310 tonn sem fengust í aðeins fjórum holum. Aflinn úr Beiti verður unninn strax og vinnslu afla úr Bjarna Ólafssyni lýkur.