mánudagur, 17. desember 2018
 
TölublöðVenjuleg útgáfa

MMR: 61% hlynntir því að úthluta fiskveiðiheimildum upp á nýtt

18. febrúar 2009 kl. 15:20

nokkur munur mælist á afstöðu ólíkra hópa

61% svarenda könnunar MMR á afstöðu fólks til úthlutunar veiðiheimilda segjast hlynntir því að stjórnvöld afturkalli fiskveiðiheimildir og úthluti þeim aftur með breyttum reglum.

Þetta kemur fram í tilkynningu frá MMR.

 Aftur á móti voru 20,7% andvígir slíkum hugmyndum og 18,3% sögðust hvorki vera hlynnt né andvíg hugmyndinni.

Í tilkynningu MMR kemur fram að nokkur munur mældist á afstöðu ólíkra hópa til þess um að stjórnvöld afturkalli með einum eða öðrum hætti gildandi fiskveiðiheimildir og úthluti þeim að nýju með breyttum reglum.

Til dæmis sögðust tæp 74% þeirra sem eru fimmtugir og eldri vera hlynntir hugmyndinni samanborið við 59,2% í aldurshópnum 30-49 ára og 53,9% í aldurshópnum 18-29 ára.

„Þó ber að líta til þess að í öllum aldurshópunum voru þeir sem sögðust hlynntir hugmyndinni meira en tvöfalt fleiri en þeir sem sögðust henni andvígir,“ segir í tilkynningu MMR.

Þá sögðust 66,6% þeirra sem búa á höfuðborgarsvæðinu fylgjandi því að yfirvöld endurskoði úthlutun fiskveiðiheimilda borið saman við 51,9% þeirra sem búa úti á landi.

Þá sögðust 16,3% íbúa höfuðborgarsvæðisins vera andvígir hugmyndinni um endurúthlutun fiskveiðiheimilda samanborið við 27,7% íbúa landsbyggðarinnar.

Þá kemur fram að af þeim sem styðja núverandi ríkisstjórn eru 74,3% sem sögðust hlynntir því að stjórnvöld afturkalli með einum eða öðrum hætti gildandi fiskveiðiheimildir og úthluti þeim að nýju með breyttum reglum.

Meðal þeirra sem segjast ekki styðja ríkisstjórnina voru 51,9% sem sögðust fylgjandi endurúthlutun fiskveiðiheimilda en 37,3% þeirra voru því andvígir.

Verulegur munur var á afstöðu svarenda eftir stuðningi þeirra við stjórnmálaflokka (þ.e. hvaða flokka þeir myndu kjósa væri gengið til kosninga nú). Þannig sögðust 35,7% sjálfstæðismanna hlynntir endurúthlutun fiskveiðiheimilda en 47,6% þeirra sögðust andvígir.

54,8% framsóknarmanna sögðust hlynntir endurúthlutun fiskveiðiheimilda en 30,3% þeirra sögðust andvígir. 69% stuðningsfólks Samfylkingarinnar kvaðst fylgjandi endurúthlutun fiskveiðiheimilda en 7,8% þess sagðist andvígt.

Þá voru 76,9% Vinstri grænna hlynntir því að stjórnvöld endurskoði úthlutun fiskveiðiheimilda en 11,5% voru því andvígir.

Alls svöruðu 971 einstaklinga könnun MMR en hún fór fram dagana 11. – 12. febrúar s.l.

Sjá könnun MMR í heild sinni. (pdf skjal)