þriðjudagur, 24. apríl 2018
 
TölublöðVenjuleg útgáfa

Norsk-íslensk síld unnin hjá Síldarvinnslunni

22. janúar 2009 kl. 16:21

einsdæmi á þessum árstíma

Norsk-íslensk síld er nú unnin í fiskiðjuveri Síldarvinnslunnar hf. en það mun vera einsdæmi að slíkt sé gert á þessum árstíma. Það var færeyska skipið Fagraberg FD-1210 sem kom með um 1.400 tonn til vinnslu. Aflinn fékkst á einum degi í norskri lögsögu og tók siglingin til Íslands tvo sólarhringa.  J

ón Már Jónsson yfirmaður landvinnslu hjá Síldarvinnslunni tjáði Fiskifréttum að síldin væri stinn og sterk á þessum árstíma og því þyldi hún vel flutning um langan veg í góðri kælingu um borð í skipinu. Því er hins vegar ekki að heilsa yfir hásumarið, sem er aðalveiðitími íslensku skipanna á þessari síld, því þá er síldin lausari í sér og viðkvæmari í meðförum.

Þó hefur norsk-íslensk síld verið unnin í einhverjum mæli í landvinnslu á Íslandi á sumrin þegar veiðarnar hafa farið fram í íslenskri lögsögu og stutt er í land.   

Vinnsla á síldinni úr Fagraberginu hófst síðustu nótt og stendur fram á laugardag, en unnið er á vöktum. Starfsmenn fiskiðjuversins taka þessari sendingu fegins hendi meðan beðið er eftir að loðnuvertíð fari í gang.

Því má bæta við að Fagraberg er í eigu dótturfélags Samherja í Færeyjum og Samherji á stóran hluta í Síldarvinnslunni. Eins og fram hefur komið eru tvö íslensk skip að veiðum á norsk-íslenskri síld í norskri lögsögu um þessar mundir, Guðmundur VE og Vilhelm Þorsteinsson EA  en báðir vinna þeir afla sinn um borð. .