mánudagur, 24. september 2018
 
TölublöðVenjuleg útgáfa

Ný Cleopatra 31 til Hornafjarðar

20. maí 2009 kl. 15:01

Nú í vikunni var afhentur nýr Cleopatra bátur frá Bátasmiðjunni Trefjum í Hafnarfirði. Hann hefur hlotið nafnið Haukafell SF 111. Að útgerðinni stendur Guðmundur Eiríksson og hyggst hann gera bátinn út á handfæri nú í sumar og líklega á línu yfir vetrartímann.

Báturinn er af gerðinni Cleopatra 31 í nýrri útgáfu. Hann er 8,5 brúttótonn og er í krókaaflamarkskerfinu.  Báturinn er búinn fjórum DNG handfærarúllum. Í bátnum er vökvakerfi tilbúið til línuveiða. 

Aðalvél bátsins er af gerðinni Isuzu 6HE1TCX 370hp tengd ZF gír. Siglingatæki eru af gerðinni JRC frá Sónar. Öryggisbúnaður bátsins kemur frá Viking.

Rými er fyrir 12-14 stk 380 lítra kör í lest.  Í lúkar er svefnpláss fyrir 2-3 auk eldunaraðstöðu með eldavél og örbylgjuofni. Setkrókur er í lúkar og stólar fyrir skipstjóra og háseta í brú.

Báturinn er annar í röðinni af fjórum sem Trefjar hafa smíðað af þessari gerð nú í vor.  Sá fyrsti Ólafur HF- 51 er nú í sýningarferð hringinn í kringum landið.