þriðjudagur, 21. maí 2019
 
TölublöðVenjuleg útgáfa

Ný Vestmannaey sjósett í Noregi

29. apríl 2019 kl. 09:40

Hin nýja Vestmannaey flaut klukkan 10.54 á laugardagsmorgun. Mynd/Guðmundur Alfreðsson

Vonir standa til að hið glæsilega skip Síldarvinnslunnar verði afhent í byrjun júlí.

Hin nýja Vestmannaey sem er í smíðum hjá skipasmíðastöðinni Vard í Aukra í Noregi var sjósett á laugardagsmorgun. 

Fréttin og myndir af sjósetningunni var birt á heimasíðu Síldarvinnslunnar þann sama dag. 

Sjósetningin átti sér stað með nokkuð óvenjulegum hætti og lýsir Guðmundur Alfreðsson útgerðarstjóri Bergs-Hugins henni svo: 

„Skipið var dregið út úr húsi í gær og því síðan komið fyrir á pramma. Pramminn var síðan dregin út á flóa og þar er honum sökkt undan skipinu þar til það flýtur. Byrjað var að dæla sjó í prammann klukkan fimm í morgun og Vestmannaey flaut akkúrat klukkan 10.54 þannig að þetta tók töluverðan tíma. Skipið er glæsilegt á floti og allir afar ánægðir með vel unnið verk. Ráðgert er að vélar skipsins verði gangsettar 5. eða 7. maí. Hinn 6. maí er mánudagur og það kemur ekki til greina að gangsetja vélarnar á mánudegi,“ segir Guðmundur sem segir að ráðgert sé að afhending skipsins fari fram 2. júlí næstkomandi.