þriðjudagur, 19. júní 2018
 
TölublöðVenjuleg útgáfa

Öll loðnuhrogn verða fryst á Akranesi

1. mars 2018 kl. 13:38

Víkingur AK siglir inn til Akraness. (Mynd: Kristján Maack)

Allt er klárt fyrir hrognaskurð og frystingu á loðnuhrognum á Akranesi.

 

Uppsjávarveiðiskipin Venus NS og Víkingur AK voru í fyrradag suður af Reykjanesi í leit að loðnu sem hentað gæti til hrognatöku. Allt er klárt fyrir hrognaskurð og frystingu á loðnuhrognum á Akranesi en þar koma um 100 manns til með að starfa á vegum HB Granda í þá daga sem loðnuhrognafrystingin stendur yfir. Frá þessu segir á heimasíðu fyrirtækisins.

„Við fórum út klukkan fimm í morgun [gærmorgun] og höfum leitað að loðnu vestur og suður af Reykjanesi. Við fengum sæmilegt kast á Hafnarleirnum en annars er búið að vera rólegt yfir þessu hjá okkur,“ sagði Albert Sveinsson, skipstjóri á Víkingi AK, í viðtali við heimasíðuna.

Að sögn Alberts er ómögulegt að segja til um þroska hrognanna í loðnunni og það skýrist ekki fyrr en eftirlitsmenn japanskra kaupenda skoði hrognin í landi. Albert reiknar með að annað hvort skipið verði kallað inn fljótlega til að hægt verði af skoða hrognin en vegna smæðar kvótans gefst ekkert svigrúm til tilraunastarfsemi úti á sjó.

„Það er klárt að eitthvað af loðnu er búið að ganga fyrir Reykjanes og inn í Faxaflóa en vandinn er að finna hana. Það er ekki auðvelt þegar skipin eru fá og dreifð,“ segir Albert.

Gunnar Hermannsson, verkstjóri á Akranesi, sem stýrt hefur hrognaskurði og -frystingu fyrir HB Granda mörg undanfarin ár, segir í fréttinni að vegna smæðar kvótans sé stefnan sú að öll loðnuhrogn verði fryst á Akranesi að þessu sinni. Akranes liggi vel við miðunum og þangað sé aðeins nokkurra klukkutíma sigling frá þeim stað sem skipin eru nú á.