mánudagur, 20. nóvember 2017
 
TölublöðVenjuleg útgáfa

Örfirisey aftur til veiða eftir mánaðarmótin

11. nóvember 2017 kl. 16:00

Örfirisey RE. (Mynd af vef HB Granda)

Þarf að sérsmíða varahlut í skrúfubúnað skipsins sem tefur viðgerð.

Frystitogarinn Örfirisey RE er nú í slipp hjá Skarvik AS í Svolvær í Norður-Noregi en skipið varð fyrir því óhappi í lok október þegar það var að veiðum í Barentshafi að bilun varð í skrúfubúnaði. Búið er að komast að orsökum bilunarinnar og standa vonir til að togarinn komist aftur til veiða í byrjun næsta mánaðar, segir í frétt á heimasíðunni fyrirtækisins. 

Eins og þar hefur verið greint frá varð Örfirisey aflvana vegna bilunar í skrúfubúnaði við veiðar í rússnesku landhelginni, um 440 sjómílur norður af Båtsfjord í Norður-Noregi aðfararnótt 27. október. Norska olíuskipið M/T Norsel dró Örfirisey til Båtsfjord og kom skipið til hafnar seinnipart miðvikudagsins 1. nóvember. 

Að sögn Herberts Bjarnasonar, tæknistjóra skipa hjá HB Granda, sem rætt er við í fréttinni  var byrjað á að landa afla skipsins og í framhaldi af því var kafari sendur til að skoða hvort hægt væri að gera við skrúfubúnaðinn með skipið á floti. Það reyndist útilokað. Fullbókað var í slippnum í Kirkenes og því var skipið dregið til Svolvær. Þangað kom Örfirisey aðfaranótt sl. miðvikudags. Vinna við skipið hófst strax eftir komuna. Eftir að stýrið var fjarlægt var skrúfan opnuð til að komast að orsök þess að hún virkaði ekki sem skildi. 

,,Þá kom í ljós að svokallaður skiptiteinn, sem stjórnar stöðu skrúfublaða, er brotinn og óviðgerðarhæfur. Búið er að setja í gang smíði á nýjum skiptiteini hjá framleiðanda skrúfubúnaðarins og standa vonir til að viðgerð ljúki um eða eftir mánaðamótin þannig að skipið komist aftur til veiða í byrjun desembermánaðar,“ segir Herbert.