sunnudagur, 25. febrúar 2018
 
TölublöðVenjuleg útgáfa

Örfirisey vélarvana og verður dregin til hafnar í Noregi

11. febrúar 2018 kl. 14:07

Örfirisey RE. (Mynd af vef HB Granda)

 

Bilun varð í aðalvél frystitogarans Örfiriseyjar RE í gærkvöldi er skipið var að veiðum í norsku lögsögunni í Barentshafi. Vegna bilunarinnar er skipið vélarvana og hefur verið samið við norsku strandgæsluna um að það verði dregið til hafnar í Tromsö í Norður-Noregi.

Frá þessu segir á heimasíðu fyrirtækisins.

Að sögn Guðmundar Herberts Bjarnasonar, hjá skipaeftirliti HB Granda, varð bilunin um 60 sjómílur norður af Honningsvaag. Bilunin tengist knastás aðalvélar. Gott veður er á svæðinu og engin hætta á ferðum. Nokkur skip eru stödd í nágrenninu sem eru tilbúin að aðstoða. Í samráði við tryggingarfélag skipsins er búið að semja við norsku strandgæsluna um að draga skipið til Tromsö þar sem viðgerð mun fara fram.

,,Skipin eru væntanleg til Tromsö á mánudagsmorgun. Þetta tjón tengist á engan hátt fyrri bilun sem varð í skrúfubúnað skipsins í lok október á síðast ári,” segir Guðmundur Herbert Bjarnason.