miðvikudagur, 17. janúar 2018
 
TölublöðVenjuleg útgáfa

Þorskaflinn í júlí jókst um 50% milli ára

13. ágúst 2009 kl. 09:48

Þorskaflinn í nýliðnum júlímánuði nam rúmum 9.000 tonnum samanborið við 6.000 tonn í sama mánuði í fyrra. Aukningin er 50%. Í því sambandi má nefna að þorskafli á strandveiðum nam nálægt 2 þúsund tonnum á þessu tímabili.

Ýsuaflinn nam rúmum 5.000 tonnum sem er  tæpum 1.300 tonnum meiri afli en í júlí 2008. Ufsaaflinn dróst saman um tæp 3.000 tonn á milli ára og nam um 6.000 tonnum en  2.600 tonn veiddust af karfa, sem er um helmingi minna en í júlí 2008.

Afli uppsjávartegunda nam tæpum 123.000 tonnum sem er um 4.000 tonnum meiri afli en í júlí 2008. Síldaraflinn jókst milli ára um tæp 9.000 tonn og nam tæpum 64.000 tonnum. Um 59.000 tonn veiddust af makríl, sem er tæpum 5.000 tonnum minni afli en í júlí 2008.

Flatfiskaflinn var rúm 3.000 tonn í júlí og jókst um 1.072 tonn frá fyrra ári. Skel- og krabbadýraafli nam 1.215 tonnum samanborið við 2.072 tonna afla í júlí 2008.

Heildaraflinn í júlí 2009 var 160.000 tonn samanborið við 153.000 tonn í sama mánuði árið áður.

Þetta kemur fram á vef Hagstofu Íslands. Þar segir ennfremur að heildaraflinn í nýliðnum júlímánuði metinn á föstu verði hafi var 1,5% minni en í júlí 2008. Það sem af sé árinu hafi aflinn aukist um 8,4% miðað við sama tímabil 2008, sé hann metinn á föstu verði. 

Munur á afla á föstu verði og í tonnum

Afli á föstu verði er reiknaður út til þess að finna breytingu á verðmæti heildaraflans að gefinni þeirri forsendu að verðhlutföll milli einstakra fisktegunda séu þau sömu og á ákveðnu viðmiðunarári sem hér er árið 2007. Hér er því um að ræða hliðstæðu við umreikning á afla yfir í þorskígildi. Aflinn í tonnum sýnir hins vegar magn aflans án tillits til þess að fisktegundir eru misjafnlega verðmætar.

Nánari upplýsingar má sjá á vef Hagstofunnar, HÉR