fimmtudagur, 21. júní 2018
 
TölublöðVenjuleg útgáfa

Þorskur í ljósum

19. september 2008 kl. 10:46

Tilraunaverkefni á Ísafirði

Unnið er að viðamiklu verkefni á Ísafirði þar sem verið er að kanna áhrif ljóss á vöxt og kynþroska þorsks í eldi.

Markmið verkefnisins er að nýta ljós til að ná fram auknum vaxtarhraða og seinkun kynþroska.

Ljós er öflugur umhverfisstýriþáttur bæði hvað varðar vöxt og kynþroska fiska. Með notkun nýrrar gerðar ljósa, sem gefa frá sér eina bylgjulengd sem dreifist betur um vatnsfasann en hefðbundin ljós, verður hægt að hafa áhrif á lykilatriði í þroskunarferli þorsks í sjókvíum, að því er segir í frétt á vef AVS-sjóðsins.

Ljósastýrð vaxtarhvatning bætir fóðurnýtingu og styttir eldistímann og þar með minnka umhverfisáhrif sjókvíaeldis. Seinkun eða hindrun kynþroska eykur gæði eldisþorsks og samantekið mun verkefnið því stuðla að aukinni hagkvæmni og framlegð í þorskeldi.

Í maí 2007 voru seiði flutt frá Hafrannsóknastofnun á Stað við Grindavík til Álftafjarðar, þá um 166 g að þyngd að meðaltali. Fiskurinn var hjá Hafrannsóknastofnun í kerum með ljósum og án ljósa í samanburðarhóp. Sömu meðhöndlun var haldið áfram eftir flutning í sjókvíar og fengu seiðin hefðbundna meðferð í þorskeldi m.t.t. umhirðu og fóðrunar.

Starfsmenn Hraðfrystihússins Gunnvarar sinna kvíunum, sem eru 6 metrar í þvermál og 5-6 metra djúpar.

Verkefnisstjóri er dr. Þorleifur Ágústsson, en hann starfar hjá Matís ohf. á Ísafirði.