miðvikudagur, 19. september 2018
 
TölublöðVenjuleg útgáfa

Reisa hátækniverksmiðju fyrir Rússa

Guðjón Guðmundsson
15. febrúar 2018 kl. 04:00

Frá undirritun samningsins. Ingólfur Árnason, forstjóri Skagans 3X, og Alexander Verkhovksy, eigandi Gidrostroy, takast í hendur fyrir miðri mynd.

Samstarf Skagans 3X, Frost og Rafeyri skilar stórum samningi í austri

Íslensku tæknifyrirtækin Skaginn 3X ásamt Frost og Rafeyri hafa undir hatti Knarr Maritime undirritað samning við útgerðar- og fiskvinnslufyrirtækið Gidrostroy um uppsetningu fullkominnar uppsjávarverksmiðju á Kuril eyjum á austurströnd Rússlands.

Verksmiðjan verður búin leiðandi tækni til að flokka, pakka og frysta 900 tonn af uppsjávarfiski á sólarhring. Ekki fæst uppgefið hver samningsupphæðin er en verksmiðjur af sambærilegri gerð og með sambærilegum búnaði kosta um og yfir þrjá milljarða króna.

Seint á síðasta ári undirrituðu fyrirtækin samning við færeyska útgerðarfélagið Varðin Pelagic um nýja uppsjávarvinnslu í Suðurey í Færeyjum. Virði samningsins er um fimm milljarðar íslenskra króna. Afkastagetu þeirrar vinnslu er allt að 1.300 tonn af pakkaðri vöru á sólarhring.

Verksmiðjan verður staðsett á Shikotan eyju sem er hluti af Kuril eyjaklasanum suður af Shakalin í Austur-Rússlandi.

Mikil uppbygging framundan

Mikil uppbygging er framundan í sjávarútvegi í Rússlandi. Rússar sem hafa farið þá leið að stefna að stóraukinni sjálfbærni í veiðum og vinnslu heima fyrir sem er ekki síst viðbrögð þeirra við viðskiptaþvingunum vestrænna þjóða.

Verksmiðjan verður gríðarleg lyftistöng fyrir mannlífið á eyjunni og mun skapa þar mikilvæg störf,“ segir Alexander Verkhovksy, eigandi Gidrostroy. „Eftir að hafa skoðað verksmiðjur víða um heim var það augljóst val að skipta við þessi íslensku félög,“ segir Verkhovksy.

Íslensku félögin þrjú hafa áður unnið saman í skipum og sett upp fjölda verksmiðja. Þau eru ásamt fyrirtækjunum Brimrún, Naust Marine, Nautic og Skipatækni aðilar að Knarr Maritime sem er markaðsarmur þeirra.

 „Það er að sýna sig að Knarr er að nýtast okkur gríðarlega vel og er í raun að ryðja brautina inn á þessa markaði,“ segir Guðmundur Hannesson, sölustjóri hjá Frost.

Mikilvægt skref inn á Kyrrahafs markaðinn 

Uppsjávarfiskur, ekki síst sardinella, er í miklum vexti á svæðinu, þannig að velgengni verkefnisins er mikilvæg.

„Verkefnið er stórt og mikilvægt fyrir bæði Gidrostroy og okkur, en þetta byrjaði allt síðasta vor þegar við seldum og afhentum kerfi þar sem okkar lausn innihélt meðal annars flokkara frá íslenskum samstarfsaðila okkar, Style“ segir Ingólfur Árnason framkvæmdastjóri Skagans 3X. Hann segir að reynslan af því verkefni hafi einfaldlega verið með þeim hætti að báða aðila langaði að vinna meira saman.

Í fréttatilkynningu frá Gidostroy kemur fram að verksmiðjan verði „rússneskt flaggskip fyrir alla aðila samningsins og að vonir standi til að bætt kælikeðja og frystitækni, sem á engan sinn líka, komi til með að auka gæði afurðanna og um leið eftirspurn.