miðvikudagur, 16. janúar 2019
 
TölublöðVenjuleg útgáfa

Rekstur Hampiðjunnar á Íslandi sameinaður í einu félagi

27. desember 2018 kl. 23:40

Hampiðjan

Eftir sameininguna verða starfsstöðvar Hampiðjunnar á Íslandi 5 talsins.

Á árinu gekk Hampiðjan hf. frá kaupum á öllu hlutafé í dótturfélaginu Fjarðanetum. Tilgangur kaupanna var að undirbúa flutning á starfsemi Hampiðjunnar á Íslandi í eitt félag.  Nafni Fjarðarneta verður breytt í Hampiðjan Ísland ehf. og sá hluti starfsemi Hampiðjunnar sem snýr að veiðarfæragerð, sölu og þjónustu á Íslandi verður færður inn í það félag.

Áætlað er að breytingarnar komi til framkvæmda þann 1. janúar 2019, en frá þessu segir á heimasíðu fyrirtækisins. 

„Með þessari breytingu verður skýrari fókus á sölustarfsemi á Íslandi og betri og heildstæðari þjónusta við viðskiptavini félagsins.  Samhliða þessu verður skilið á milli sölu á veiðarfæraefni og sölu á veiðarfærum með skýrari hætti líkt og er með önnur félög innan Hampiðjusamstæðunnar erlendis,” segir Hjörtur Erlendsson forstjóri Hampiðjunnar hf.

Eftir sameininguna verða starfsstöðvar Hampiðjunnar á Íslandi 5 talsins; í Reykjavík, Vestmannaeyjum, Neskaupstað, Akureyri og á Ísafirði.​ Starfsmenn Hampiðjan Ísland verða um 63 talsins eftir þessa breytingu.

Jón Oddur Davíðsson núverandi sölu- og markaðsstjóri Hampiðjunnar mun taka við starfi framkvæmdastjóra Hampiðjan Ísland, Árni Skúlason verður framleiðslustjóri, Jón Einar Marteinsson mun stýra útibúinu á Austurlandi, Hermann Guðmundsson verður rekstrarstjóri á Akureyri og Snorri Sigurhjartarson rekstrarstjóri á Ísafirði.