þriðjudagur, 25. september 2018
 
TölublöðVenjuleg útgáfa

Rysjótt ufsaveiði hjá Engey

11. apríl 2018 kl. 12:00

Engey RE. (Mynd Kristján Maac)

Þorskveiðin ekkert sérstök utan 12 mílna markanna - en þar er mokveiði hjá minni togskipum.

Ísfisktogarinn Engey RE er nú í sínum öðrum túr eftir nokkrar frátafir vegna ársskoðunar sem framkvæmd var í slipp í Reykjavík. Friðleifur Einarsson, skipstjóri á Engey, segir í viðtali á heimasíðu fyrirtækisins aflabrögðin vera ágæt en þau hafi aðeins dalað eftir páskana.

„Við komumst út á Skírdag og vorum að veiðum fram yfir páska. Aflinn var fullfermi, 600 kör af fiski, en það samsvarar um 180 tonnum,“ segir Friðleifur en er við náðum tali af honum var Engey stödd á Selvogsbanka.

„Við fórum úr höfn á miðnætti sl. miðvikudag og höfum lengst verið á Fjöllunum og svæðinu þar í kring. Það er nóg af gullkarfa en við höfum mest lagt okkur eftir því að finna og veiða ufsa. Það hefur gengið upp og ofan. Ufsinn kemur í slurkum. Einn daginn er hægt að hitta á góða ufsaveiði en svo er ekkert að hafa þann næsta,“ segir Friðleifur en hann segir ufsann vera af ágætri vertíðarstærð en meira hafi borið á heldur smærri ufsa í yfirstandandi veiðiferð.

„Reyndar hefur þorskveiðin oft verið betri en svo virðist sem að mest af þorskinum haldi sig innan tólf mílna markanna og inn fyrir þá línu megum við ekki fara. Minni togskipin eru hins vegar að fá fínustu þorskveiði innan við línuna,“ segir Friðleifur í viðtali við heimasíðuna.