sunnudagur, 26. maí 2019
 
TölublöðVenjuleg útgáfa

Safnar reynslusögum víða um land

12. maí 2019 kl. 12:00

Síldarminjasafnið er afar glæsilegt og merkilegt safn. Mynd/Síldarminjasafnið

Viðmælendur hafa fram til þessa verið 50 talsins, á Siglufirði, Dalvík, í Hrísey, á Akureyri, Húsavík, Ísafirði, Reykjavík og Akranesi. Þetta eru m.a. fyrrum síldarstúlkur, verksmiðjukarlar, sjómenn, skipstjórar og netagerðarmenn.

Síðustu vikurnar hefur Anita Elefsen, safnstjóri Síldarminjasafns Íslands á Siglufirði, ferðast um landið með kvikmyndatökumanni í þeim tilgangi að taka viðtöl við bæði menn og konur sem unnu í síld, hvort sem var í landi eða á sjó.

Meginmarkmiðið er að afla heimilda um líf og störf fólks, tíðarandann, rómantíkina, erfiðið, tilfinningarnar, tónlistina, félagslífið, verkunaraðferðir, hjátrú og aðra mikilvæga þætti þessa tímabils í sögu þjóðarinnar og varðveita á Síldarminjasafninu.

Frá þessu segir á heimasíðu safnsins.

Þar segir að jafnframt sé ætlunin að velja stutt brot úr viðtölunum til miðlunar í safnhúsum Síldarminjasafnsins. „Sýnt er að áhugi gesta kviknar fljótt þegar sagan er sögð út frá persónulegri reynslu eða hún persónutengd á einhvern hátt. Að því sögðu má gera ráð fyrir að lifandi frásagnir fólks sem sjálft tók þátt í síldarævintýrinu veki mikinn áhuga gesta og dýpki skilning þeirra á þeirri sögu sem miðlað er á safninu,“ segir í fréttinni.

Viðmælendur hafa fram til þessa verið fimmtíu talsins, á Siglufirði, Dalvík, í Hrísey, á Akureyri, Húsavík, Ísafirði, Reykjavík og Akranesi. Meðal þeirra sem rætt hefur verið við eru fyrrum síldarstúlkur, verksmiðjukarlar, sjómenn, skipstjórar og netagerðarmenn.

Á næstum dögum verður farið austur á Seyðisfjörð og til Raufarhafnar og þar með lokið við upptökur í bili. Áætlað er að viðmælendur verði nálægt sjötíu í heildina - en upphaflega var stefnt að þrjátíu viðtölum.

Verkefnið er styrkt af Safnaráði en þar að auki hafa söfn og menningarstofnanir lagt verkefninu lið með vinnuaðstöðu sem hefur komið sér afar vel.