fimmtudagur, 19. júlí 2018
 
TölublöðVenjuleg útgáfa

Samið um veiðar á kolmunna og síld

22. október 2009 kl. 15:11

Íslendingar mega veiða 88 þús. tonn af kolmunna og 215 þús. tonn af norsk-íslenskri síld á næsta ári. Þetta er niðurstaðan hvað Ísland varðar eftir strandríkjasamkomulag um stjórnun þessara veiða sem undirritað var á fundi í London sem lauk í dag.

Heildaraflamark í kolmunna verður 540.000 tonn og er sú ákvörðun í samræmi við ráðgjöf Alþjóðahafrannsóknarráðsins (ICES) og þá langtíma stjórnunaráætlun sem ICES vann fyrir strandríkin og samþykkt var haustið 2008. Sú langtíma stjórnunaráætlun tryggir sjálfbæra nýtingu stofnsins til lengri tíma.

Íslenskum skipum verður heimilt að veiða 87.625 tonn.

Einnig var skrifað undir samning um stjórnun veiða úr norsk-íslenska síldarstofninum og er heildaraflamarkið 1.483.000 tonn árið 2010.

Niðurstaða strandríkjanna er í fullu samræmi við vísindaráðgjöf ICES og þá langtíma stjórnunaráætlun sem sett hefur verið. Staða stofnsins er góð og stofninn hefur verið nýttur á sjálfbæran hátt undanfarin ár. Í ljósi þess að árgangar undanfarinna fjögurra ára hafa verið minni heldur en á tímabilinu 1998 til 2004 þar sem sterkir árgangar komu inn í stofninn lagði ICES til 9,7% niðurskurð milli ára og var því fylgt.

Samkvæmt samkomulaginu verður íslenskum skipum heimilt að veiða 215.183 tonn.

Í sendinefnd Íslands á strandríkjafundinum voru Hrefna Karlsdóttir formaður frá sjávarútvegs- og landbúnaðarráðuneytinu og Kristján Þórarinsson frá LÍÚ.