fimmtudagur, 14. desember 2017
 
TölublöðVenjuleg útgáfa

Samið um smíði sjö togara

3. desember 2017 kl. 15:59

Tölvu­gerð mynd af skip­un­um sjö sem samið var um smíði á. Lengst til vinstri eru tvö skip í lit­um Gjög­urs, síðan kem­ur skip Útgerðarfé­lags Ak­ur­eyr­inga, þá tvö skip Skinn­ey-Þinga­ness og loks tvö skip Bergs-Hug­ins. Teikn­ing/​VARD

Fjögur útgerðarfyrirtæki standa að raðsmíði sjö nýrra ísfisktogara

Undirritaðir hafa verið samningar um smíði á sjö nýjum togurum fyrir fjögur íslensk útgerðarfyrirtæki. Tvö skip verða smíðuð fyrir útgerðarfélagið Berg-Huginn, dótturfélag Síldarvinnslunnar; önnur tvö skip fyrir Gjögur, tvö fyrir Skinney – Þinganes og eitt fyrir Útgerðarfélag Akureyringa.

Þetta kemur fram í frétt á vef Síldarvinnslunnar, en skipin sem smíðuð eru fyrir Berg-Hugin er ætlað að leysa af hólmi Vestmanney VE og Bergey VE. Áætlað er að smíði hvors skips taki 14 mánuði og er gert ráð fyrir að fyrra skipið verði afhent kaupanda í marsmánuði 2019 og hið síðara í maí 2019.

Nýju skipin eru smíðuð af VARD í Noregi og fyrirkomulag og val á búnaði er unnið í samstarfi við útgerðirnar. Skipin verða 28,95 m að lengd og 12 m að breidd. Í skipunum verða tvær aðalvélar með tveimur skrúfum. Ný kynslóð rafmagnsspila verða í skipunum frá Seaonics.

Þar segir jafnframt:

Þessi nýju systurskip verða vel búin í alla staði og í þeim verða íbúðir fyrir 13 manns. Þau munu taka um 80 tonn af ísuðum fiski. Við hönnun skipanna hefur verið vandlega hugað að allri nýtingu á orku.

Við hönnun á vinnsludekki verður höfð að leiðarljósi vinnuaðstaða sjómanna, öflug kæling og góð meðhöndlun á fiski. Horft verður til þeirra gæða og reynslu sem íslenskir framleiðendur búa yfir á smíði vinnslubúnaðar.

Það var Gunnþór B. Ingvason, framkvæmdastjóri Síldarvinnslunnar, sem undirritaði samninginn fyrir hönd dótturfyrirtækisins en Eyvindur Sólnes lögmaður á Lex lögmannsstofu aðstoðaði útgerðirnar við gerð samninganna. Um samningana hafði Gunnþór eftirfarandi að segja:

„Ástæða þess að ákveðið var að semja við VARD er sú að um er að ræða öflugt fyrirtæki, þar sem ferlið frá hönnun skips til afhendingar á fullbúnu skipi er á hendi sama aðila.  Því er aðeins við einn aðila að semja.“

Síldarvinnslan kynnti í sumar áform sín um að endurnýja allan ísfisktogaraflota fyrirtækisins og er þessi nýsmíðasamningur fyrsti áfangi þess verkefnis.