miðvikudagur, 17. janúar 2018
 
TölublöðVenjuleg útgáfa

Síldarfrysting hafin á Vopnafirði

26. maí 2009 kl. 16:36

Fyrsta síldin úr norsk-íslenska síldarstofninum á þessari vertíð barst til Vopnafjarðar nú í morgun er áhöfnin á Faxa RE kom þangað með rúmlega 400 tonna afla. Löndun hófst þegar í stað eftir að skipið lagðist að bryggju um tíuleytið og fór síldin til vinnslu í fiskiðjuveri HB Granda þar sem hún er flökuð og fryst.

Að sögn Alberts Sveinssonar skipstjóra á Faxa fékkst síldin í tveimur holum djúpt norðaustur af Langanesi. ,,Við vorum með um 200 tonna hol á sunnudagskvöldinu en síðan dreifði síldin sér og mest allur gærdagurinn fór í að leita að síld í veiðanlegu magni. Við fengum svo annað álíka stórt hol seinni partinn í gær,” segir Albert í viðtali á heimasíðu fyrirtækisins.

Magnús Róbertsson, vinnslustjóri HB Granda á Vopnafirði, var að vonum ánægður með síldaraflann sem byrjað var að vinna nú í hádeginu og þá ekki síst það að síldin skyldi henta í frystingu.

,,Síldin er reyndar frekar horuð eins og hún er jafnan á þessum árstíma. Hún hentar samt til vinnslu fyrir manneldi og það er fyrir mestu,” segir Magnús. Þess má geta að Lundey NS er einnig á síldveiðum og fékk skipið um 200 tonna afla í gærkvöld