föstudagur, 14. desember 2018
 
TölublöðVenjuleg útgáfa

Síldarstofninn mældist minni en í október

3. desember 2009 kl. 17:18

Í gær lauk leiðangri Hafrannsóknastofnunarinnar þar sem metið var magn og útbeiðsla sumargotssíldar við Ísland. Verkefnið, sem staðið hefur sl. 17 daga var m.a. í samstarfi við útgerðir síldveiðiskipa, sem könnuðu hluta rannsóknasvæðisins.

Úrvinnsla þeirra gagna sem safnað var er ekki að fullu lokið. Bráðabirgða niðurstöður staðfesta þó að sýking í veiðistofninum er svipuð og var í mælingu sem fram fór í samstarfi við útgerðir í október sl. eða yfir 40%. Jafnframt benda niðurstöður til þess að veiðistofninn sé minni en mælingar í október gáfu til kynna. Ástæður þessa mismunar geta verið ýmsar, m.a. mæliskekkja og aðstæður til mælinga, sem voru ekki taldar eins góðar nú og þær voru í október sl. vegna dreifingu síldarinnar og slæms veðurs, að því er segir á vef Hafrannsóknastofnunar.

Dröfn RE kannaði veiðisvæðið við Breiðafjörð auk þess sem gerð var athugun á útbreiðslu og mergð smásíldar allt frá Breiðafirði, vestur um að Öxarfirði. Síldveiðiskipin Börkur NK, Háberg EA, Faxi RE, Lundey RE og Álsey VE tóku þátt í mælingum á svæðinu frá miðjum Austfjörðum suður um að Breiðafirði.

Hafrannsóknastofnunin mun áfram fylgjast með ástandi sýkingar í stofninum á komandi vikum í samstarfi við veiðiskip og með leiðangri í janúar.