miðvikudagur, 16. janúar 2019
 
TölublöðVenjuleg útgáfa

Síldarvinnslan hefur hlotið jafnlaunavottun

21. desember 2018 kl. 13:30

Starfsfólk Síldarvinnslunnar í Neskaupstað í makríltörn. MYND/Síldarvinnslan

Síldarvinnslan er fyrsta sjávarútvegsfyrirtækið á landinu til að ljúka vottunarferlinu, en einungis 40 fyrirtæki á landinu hafa hlotið jafnlaunavottun.

Síldarvinnslan í Neskaupstað hefur formlega hlotið jafnlaunavottun, fyrst sjávarútvegsfyrirtækja á landinu. Jafnlaunavottun er til staðfestingar á því að enginn óútskýrður kynbundinn launamunur sé til staðar hjá fyrirtækinu. Einungis 40 fyrirtæki á landinu öllu hafa hlotið jafnlaunavottun sem þessa.

 Frá þessu er greint á vef fyrirtækisins.

Hákon Ernuson, starfsmannastjóri, segir að talsverð vinna felist í því að fara í gegnum vottunarferlið.

„Við þurftum að fara í gagngera rýni á alla launastjórnun hjá fyrirtækinu og tryggja að til væru verklagsreglur um allt sem snýr að launamálunum. Við verðum að geta sýnt nákvæmlega hvað liggur til grundvallar ákvörðunum á sviði launamála. Síðan eru tekin raungögn úr launakerfinu og öll laun skoðuð og þau borin saman með kerfisbundnum hætti til að greina hvort einhversstaðar sé að finna óútskýrðan launamun. Niðurstaðan var sú að slíkan launamun væri ekki að finna og var það ánægjulegt. Allar verklagsreglur og launagreiningin þurftu síðan að fara í gegnum rýni hjá löggiltri skoðunarstofu sem staðfestir að þetta sé allt gert í samræmi við viðkomandi staðal. Vinna við þetta hefur staðið yfir í marga mánuði, en Sigurður Ólafsson hefur stýrt verkefninu. Þá veitti Capacent okkur góða aðstoð við verkefnið. Það hafa margir lagt hönd á plóginn við þessa vinnu og vinnunni verður ekki lokið við að fá vottunina. Við þurfum sífellt að vinna í því að bæta launastjórnunina og þurfum að framkvæma innri úttektir árlega. Og síðan þarf að fá löggilta skoðunarstofu til að staðfesta að allt sé gert samkvæmt bókinni,“ segir Hákon.