þriðjudagur, 17. júlí 2018
 
TölublöðVenjuleg útgáfa

Skipin HB Granda kölluð heim til gulldepluveiða

29. janúar 2009 kl. 13:55

Vegna veðurútlits á kolmunnamiðunum djúpt suður af Færeyjum hefur verið ákveðið að kalla skip HB Granda heim og eru þau nú á leiðinni til Vopnafjarðar. Stefnt er að því í framhaldinu að skipin fari til veiða á laxsíldartegundinni gulldeplu.

Að sögn Vilhjálms Vilhjálmssonar, deildarstjóra uppsjávarsviðs HB Granda, er von á skipunum þremur til Vopnafjarðar á morgun. Faxi RE er með um 1150 tonna kolmunnaafla, Ingunn AK er með um 1200 tonn og Lundey NS með um 1000 tonn. Það sem af er árinu hafa skipin þrjú samtals veitt um 4.900 tonn af kolmunna syðst í færeysku lögsögunni. Heildarkvóti HB Granda á þessu ári er um 24.000 tonn.

,,Skipin fara væntanlega á gulldepluveiðar þar til loðnuveiðarnar hefjast. Talið er að nýleg loðnutroll og -pokar geti gagnast við þær veiðar og við eigum slík veiðarfæri. Síðan er nýtt sérbúið troll í smíðum hjá Hampiðjunni og það munum við nýta til veiðanna,“ segir Vilhjálmur Vilhjálmsson á heimasíðu HB Granda.