þriðjudagur, 25. september 2018
 
TölublöðVenjuleg útgáfa

Skortur á leigukvóta ýsu veldur vandræðum

21. september 2009 kl. 09:46

Þriðjungs niðurskurður veiðiheimilda í ýsu er farinn að segja til sín.  Nánast ómögulegt er að fá leigðan ýsukvóta öfugt við það sem hefur verið undanfarin ár þegar nægt framboð var. Afleiðingar þessa eru margvíslegar m.a. fyrir þá sem leigt hafa til sín ýsu á undanförnum árum. 

Í frétt á vef Landssambands smábátaeigenda segir að margir þeirra sem nú séu að komast í vandræði hafi nægar veiðiheimildir í þorski en standi nú frammi fyrir því að geta ekki nýtt sér þær þar sem ýsa fæst alltaf með þorskinum. Einnig hafi þetta þær afleiðingar að framboð á línuveiddri ýsu minnki og þar með útflutningsverðmæti þar sem minna fáist fyrir ýsu sem veidd sé í troll. Í þriðja lagi komi þetta niður á þorskveiðunum, þær sé ekki hægt að stunda með eins mikilli hagkvæmni og verið hafi.

LS hefur rætt þessi mál við sjávarútvegsráðuneytið og mun á næstu dögum, ef engar breytingar verða á, senda Jóni Bjarnasyni sjávarútvegs- og landbúnaðarráðherra hugmyndir til umræðu um hvernig megi liðka til með viðskipti með veiðiheimildir á ýsu.     

Krókaaflamarksbátar leigðu til sín yfir fjögur þúsund tonn

Heildarýsuafli síðastliðins fiskveiðiárs varð rúm 89 þús. tonn.  Hlutur krókaaflamarks í þeirri tölu var 21 þús. tonn eða 24% heildaraflans.  Hlutdeild þeirra í ýsunni er hins vegar 15%.  Mismunurinn hefur komið með því að leigja til sín úr aflamarkskerfinu og flutningi milli ára, en alls bættu krókaaflamarksbátarnir við sig á fimmta þúsund tonna eða um rúmum fjórðungi veiðiheimilda sinna í ýsu á sl. fiskveiðiári með því að leigja veiðiheimildir af stærri skipum.