fimmtudagur, 20. september 2018
 
TölublöðVenjuleg útgáfa

Smábátur: Hásetahluturinn um 3 milljónir í ágúst

4. september 2009 kl. 15:00

Krókaaflamarksbáturinn Ragnar SF gerði það heldur betur gott á nýliðnu fiskveiðiári. Heildaraflinn er 1.329 tonn og verður hann eflaust aflahæsti smábáturinn á árinu. Afli bátsins í ágúst var 218 tonn í 24 róðrum og hásetahluturinn eftir því. Þessar upplýsingar koma fram í Fiskifréttum sem fylgja Viðskiptablaðinu.

Þetta er metafli því hingað til hefur smábátur fengið mest 185 tonn í einum mánuði. Fyrr í mánuðinum sló Ragnar SF annað aflamet en þá fékk hann 20,4 tonn í einum róðri en metið til þessa í einum róðri hjá smábáti var 17,6 tonn.

Afli Ragnars SF í ágúst var aðallega þorskur og aflaverðmæti bátsins losaði 40 milljónir króna í mánuðinum, að því er Arnar Ragnarsson skipstjóri sagði í samtali við Fiskifréttir. Þeir eru fjórir á bátnum og hásetahluturinn í ágúst var um 3 milljónir króna.

Ragnar SF er með heimahöfn í Hornafirði en hann hefur róið frá Seyðisfirði í ágúst. ,,Ég vil þakka þennan árangur því að við höfum náð að halda okkur þar sem fiskurinn er. Hér hefur verið ævintýralegur afli,“ sagði Arnar Ragnarsson.