fimmtudagur, 18. janúar 2018
 
TölublöðVenjuleg útgáfa

Þorskstofninn aldrei mælst stærri frá 1996

12. desember 2017 kl. 12:21

Rannsóknaskipið Árni Friðriksson. Mynd/Einar Ásgeirsson

Vísitala ýsu er nú nálægt meðaltali tímabilsins.

Stofnvísitala þorsks og gullkarfa eru þær hæstu síðan mælingar hófust árið 1996. Fyrstu vísbendingar um  árganginn frá 2017 gefa til kynna að hann sé yfir meðalstærð. Vísitala ýsu er nú nálægt meðaltali tímabilsins.

Þetta eru niðurstöður úr haustralli Hafrannsóknastofnunar sem kynntar voru í dag.

Eins segir að vísitala veiðistofns djúpkarfa hefur hækkað undanfarin ár eftir sögulegt lágmark en nýliðun er áfram mjög léleg. Vísitala veiðistofns grálúðu hefur hækkað jafnt og þétt frá árinu 2006 þegar hún var í lágmarki. Stofnvísitölur margra tegunda, eins og ufsa, langlúru, skarkola, þykkvalúru, keilu, löngu, gulllax og litla karfa mældust háar og í mörgum tilfellum þær hæstu frá árinu 1996. Stofnar hlýra, tindaskötu og skrápflúru eru hinsvegar í sögulegu lágmarki.

Nánari niðurstöður um stofnvísitölur, útbreiðslu, meðalþyngdir og hitastig sjávar má finna í skýrslunni Stofnmæling botnfiska að haustlagi 2017: Framkvæmd og helstu niðurstöður.

Stofnmæling botnfiska að haustlagi (haustrall) fór fram í 21. sinn dagana 4. október til 9. nóvember. Rannsóknasvæðið var umhverfis Ísland allt niður á 1500 metra dýpi. Alls var togað með botnvörpu á 375 stöðvum. Rannsóknaskipið Árni Friðriksson RE og togarinn Ljósafell SU voru notuð til rannsóknarinnar. 

Helsta markmið haustrallsins er að styrkja mat á stofnstærð botnlægra nytjastofna á Íslandsmiðum með sérstakri áherslu á djúpkarfa, grálúðu og aðra djúpfiska. Auk þess er markmiðið að fá annað mat, óháð aflagögnum, á stofnstærð þeirra nytjastofna sem Stofnmæling botnfiska á Íslandsmiðum (marsrall) nær yfir, og safna upplýsingum um útbreiðslu, líffræði og fæðu tegundanna.

Niðurstöðurnar eru mikilvægur þáttur árlegrar úttektar Hafrannsóknastofnunar á ástandi helstu nytjastofna við landið sem lýkur með veiðiráðgjöf í júní 2018.