sunnudagur, 9. desember 2018
 
TölublöðVenjuleg útgáfa

Tekjurýrnun 25 til 30 milljarðar

11. maí 2017 kl. 08:00

Á togveiðum. (Mynd: Þröstur Njálsson).

Styrking krónunar leiðir til þess að framlegð í sjvarútvegi er að hverfa hægt og bítandi

Styrking krónunnar hefur haft veruleg áhrif á rekstur sjávarútvegsfyrirtækja. Raungengi krónunnar er nú svipað og það var fyrir hrun. Ætla má að tekjur vegna bolfiskafurða verði um 25 til 30 milljörðum króna lægri árið 2017 en þær voru árið 2015. Þetta kemur fram í viðtali í nýjustu Fiskifréttum við Hallveigu Ólafsdóttur, hagfræðing Samtaka fyrirtækja í sjávarútvegi. 

Á sama tíma og tekjur rýrna hækkar innlendur kostnaður. Þannig hefur launavísitalan hækkað um 27% frá upphafi árs 2014 en gengi krónunnar hefur styrkst um 26% á sama tímabili. Framlegð í botnfiskveiðum og -vinnslu á árinu 2015 var góð, eða um 27%, en gera má ráð fyrir að framlegðin fari niður í 16% í ár. 

Pétur H. Pálsson, framkvæmdastjóri Vísis hf., sagði í samtali við Fiskifréttir að rekstur bolfiskvinnslunnar væri að nálgast þolmörkin. Framlegð væri að hverfa hægt og bítandi. Á sama tíma væri rætt um að auka álögur á greinina. „Eina raunhæfa leiðin til að bregðast við þessari stöðu er að stækka einingar með sameiningu fyrirtækja. Einnig er hægt að fjárfesta í betri tækni en það yrði þá ekki gert nema með auknu hlutafé,“ sagði Pétur. Hann bætti því við að sameining fæli óhjákvæmilega í sér fækkun skipa, fiskvinnslustöðva og ófaglærðs fólks. 

Sjá nánar í nýjustu Fiskifréttum sem koma út í dag.